Anija e dytë italiane “Libra” me 8 emigrantët në Shëngjin, një prej tyre kthehet në Itali për arsye shëndetësore, të tjerët në Gjadër

Nga Gazeta Si- Ka përfunduar verifikimi i 8 emigrantëve nga Egjipti dhe Bangladeshi në qendrën pritëse të Shëngjinit, të cilët erdhën mëngjesin e kësaj të premteje me anijen “Libra” rreth orës 7:30.

Sipas mediave italiane, një nga tetë emigrantët, është përfshirë në kategorinë e njerëzve me probleme shëndetësore. Refugjati më pas do të dërgohet në Itali, në Brindizi, nga e njëjta anije e Marinës Detare Italiane.

Ndërsa 7 të tjerët mësohet se janë transferuar mbrëmjen e të premtes në kampin e Gjadrit, aty ku do të ndiqen edhe procedurat e tjera të rastit për shqyrtimin e azilit.

Aty ata do të presin vendimin e autoriteteve italiane për kërkesën për azil, por gjasat i kanë të pakta pasi Egjipti dhe Bangladeshi janë përfshirë në listën e Vendeve të Sigurta nga Italia.

Kjo është hera e dytë që anija patrulluese e marinës italiane “Libra” ka marrë rrugën drejt Shqipërisë, për të zbarkuar këtë herë në portin e Shëngjinit, me 8 emigrantë të kapur disa ditë më parë në jug të Lampedusës.

Operacioni zhvillua nën masa të sigurie, të karabinierëve italianë dhe policisë shqiptare. Grupi i parë i emigrantëve të cilët mbërritën më 16 tetor qëndruan vetëm tre ditë në Shqipëri, pasi Gjykata e Romës detyroi Italinë të kthejë mbrapsht kontigjentin e azilkërkuesve sepse nuk vinin nga vende të sigurta.

Pas vendimit të Gjykatës së Romës për ndalimin e dërgimit të emigrantëve në Shqipëri dhe kthimin e tyre në Itali, Këshilli i Ministrave në Itali ka miratuar një dekret ligjor për këtë çështje.

Masa synon të kapërcejë ngërçin e krijuar nga vendimi i gjyqtarëve për të mos vleftësuar mbajtjen e disa azilkërkuesve në qendrën e pritjes së Gjadrit për shkak se vijnë nga vende të pasigurta.

Shoqatat e Azilit dhe Emigracionit (TAI), janë me mision në Shqipëri me Grupin Parlamentar të Kontaktit.

Misioni monitorues përfshin vizita në qendrat e pritjes në Shëngjin për të verifikuar kushtet materiale të ndalimit (hapësira banimi, tualete, akses në hapësira të hapura), respektimin e procedurave ligjore dhe ndërkombëtare, duke përfshirë mundësinë që migrantët të zgjedhin një avokat dhe të marrin informacion në gjuhën e tyre legjitimitetin e procesit të përzgjedhjes dhe mbajtjes.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.