Gazeta Si – Administratori dhe një punonjëse e një “Call center”-it që mashtronin shtetas të huaj për të investuar në bursa fiktive, janë prangosur në Tiranë.
Gjithashtu u shpall në kërkim pronari i subjektit të paregjistruar në organet tatimore, B.H., 36 vjeç, banues në Tiranë.
Si rezultat i operacionit “Last call 2” u bë arrestimi në flagrancë i shtetasve:
– S. N., 24 vjeç, banues në Tiranë, administrator i një subjekti call center;
– R. S., 25 vjeçe, banuese në Tiranë, e punësuar si operatore në këtë subjekt.
“Nga veprimet hetimore ka rezultuar se shtetasi S. N. administronte një subjekt privat call center, me pronar shtetasin B. H., në zonën e Pazarit të Ri.
Në këtë subjekt të paregjistruar në organet kompetente ishte e punësuar si operatore shtetasja R. S., e cila, së bashku me administratorin, telefononin shtetas të huaj, u prezantoheshin si agjentë shitjesh dhe përmes mashtrimit, i bindnin ata që të investonin në bursën fiktive Forex,” njoftoi policia.
Gjatë operacionit u sekuestruan në cilësinë e provës materiale 9 njësi kompjuterike, aparate celulare dhe lista me të dhëna të ndryshme të shtetasve të huaj që dyshohet se janë mashtruar, për të investuar në bursa fiktive.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
