.png)
Nga Gazeta Si- “Do të funksionojnë”, tha Giorgia Meloni, duke iu referuar kampeve të emigrantëve në Shqipëri. Për ta përsëritur konceptin, në Senat, gjatë pyetjeve, ajo njoftoi se “deri në fund të kësaj jave, mbi 25% e emigrantëve të ndaluar do të jenë riatdhesuar tashmë”. Dhe, sipas mediave italiane, kjo përqindje përkthehet në 9 emigrantë.
Kjo procedurë në kohë të shpejtë, për kryeministren Meloni, është tregues i mirëfunksionimit të strategjisë së dy vendeve Shqipëri-Itali.
Lidhur me politikat për menaxhimin e flukseve emigratore, Meloni theksoi faktin se “ne duam një Itali që më në fund është e aftë të zbatojë rregullat, të jetë e pakompromis me ata që kryejnë krime dhe të mbrojë sigurinë e qytetarëve të ndershëm”, deklaroi Meloni në fjalën e saj në Senat.
Kryeministrja shprehu vendosmërinë për çuarjen përpara të reformave institucionale dhe të drejtësisë, ndërsa vendosi theksin te zbatimi i strategjisë për menaxhimin e emigrantëve të parregullt nëpërmjet qendrave të ngritura në Gjadër e Shëngjin.
Kuvendi i Shqipërisë miratoi më 22 shkurt 2024 marrëveshjen Shqipëri-Itali për emigrantët me 77 vota pro.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
