.png)
Gazeta Si – Grupi parlamentar i PD i ka bërë thirrje Kuvendit për një seancë të jashtëzakonshme, për sa i përket mandatit të deputetes së PS, Olta Xhaçka.
Kërkesa, drejtuar kryetares së Kuvendit Elisa Spiropali, mban firmën e 29 deputetëve demokratë, të cilët theksojnë se “është e papranueshme mbrojtja politike dhe pengimi ndaj drejtësisë që mazhoranca po bën për rastin e ish-ministres dhe deputetes Olta Xhaçka, duke injoruar Kushtetutën dhe duke penguar zbatimin e dy vendimeve të Gjykatës Kushtetuese”.
“Ne dënojmë me forcë standardin ‘një drejtësi për Edi Ramën dhe një drejtësi tjetër për gjithë të tjerët’. Në çdo vend demokratik zbatimi i vendimeve të Gjykatës Kushtetuese është i detyrueshëm dhe themeli mbi të cilin ngrihet një shtet ligjor”, thuhet në letrën e deputetëve të opozitës drejtuar Kryetares së Kuvendit.
PD pretendon se bashkëshorti i Xhaçkës, Artan Gaçi është favorizuar si “investitor strategjik për ndërtimin e një resorti në Dhërmi në fillim të vitit 2022.”
Ish-deputeti socialist Artan Gaçi u shpall investitor strategjik, dhe me vendim qeverie iu dha e drejta e përdorimit të brigjeve në Dhërmi, PD kërkoi heqjen e mandatit të Olta Xhaçkës me argumentin se ka konflikt interesi.
Socialistët e rrëzuan këtë kërkesë, duke detyruar një pjesë të grupit të PD t’i drejtohet Gjykatës Kushtetuese. Kjo e fundit e pranoi kërkesën duke rikthyer çështjen në Kuvend.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
