.png)
Gazeta Si – Në një operacion të policisë së Lezhës, mbrëmjen e të hënës, në fshatin Rrilë u zbulua një magazinë e përshtatur për kultivimin e kanabisit, ku janë gjetur rreth 1 mijë rrënjë. Policia njofton se në pranga janë vënë babë e bir, si dhe një punonjës i OSHEE.
Magazina ndodhej pranë superstradës Lezhë-Laç, në afërsi të kryqëzimit të Spitenit. Veç armëve të zjarrit dhe municioneve, u sekuestruan bimë kanabis dhe sende të ndryshme për kultivimin, ndriçim artificial dhe sisteme ajrosjeje.
Sipas policisë, gjatë kontrollit në një objekt trekatësh, në katin e dytë u konstatua një dhomë e përshtatur për kultivimin dhe tharjen e bimëve narkotike, me llamba dhe pajisje që furnizoheshin me energji elektrike në mënyrë të paligjshme.
Nga hetimet dhe ndërhyrja u sekuestruan 8.8 kilogramë kanabis të tharë, 1.064 bimë dhe 960 fidanë kanabis, 850 fara kanabisi, 106 llamba për kultivim, 180 gramë kokainë, 3 armë zjarri, 2 armë sportive, 1 automjet dhe 4 celularë.
Në flagrancë u arrestuan babë e bir, A.Gj., 57 vjeç dhe A.Gj., 22 vjeç, të dyshuar si autorë të veprimtarisë kriminale.
Gjithashtu, u arrestua një punonjës i OSHEE-së, Gj.D., 59 vjeç, i dyshuar si bashkëpunëtor në kultivimin e bimëve narkotike dhe për shpërdorim detyre, ndërsa katër punonjës të tjerë të OSHEE-së po hetohen për shpërdorim detyre.
Në banesat e të arrestuarve, policia sekuestroi gjithashtu 180 gramë kokainë dhe disa armë, përfshirë armë zjarri dhe armë sportive.
Hetimet tregojnë se kjo veprimtari kriminale ishte zhvilluar për disa muaj, ndërsa policia vijon dokumentimin e plotë të saj dhe identifikimin e personave të tjerë të përfshirë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
