Nga Gazeta ‘Si’– Ish-presidenti i Venezuelës, Nicolás Maduro, pritet të bëjë paraqitjen e tij të parë para gjykatës federale në New York City, ku do të përballet me akuza të rënda për trafik droge dhe armësh.
Seanca dëgjimore do të zhvillohet në mesditë para gjyqtarit amerikan Alvin Hellerstein, një jurist me përvojë të gjatë, i cili ka mbikëqyrur këtë çështje për më shumë se një dekadë.
Departamenti i Drejtësisë i SHBA-ve publikoi një padi të re ndaj Maduros, pjesë e një hetimi penal që ka vazhduar prej rreth 15 vitesh, ndërsa Maduro është përfshirë zyrtarisht si i pandehur prej gjashtë vitesh.
Autoritetet amerikane e akuzojnë atë për drejtimin e një rrjeti ndërkombëtar kriminal të lidhur me trafikun e drogës drejt Shteteve të Bashkuara.
Presidenti amerikan Donald Trump e ka cilësuar gjyqtarin Hellerstein si “shumë të respektuar” dhe ka mbrojtur veprimet e administratës së tij, duke i paraqitur ato si pjesë të një lufte kundër trafikut ndërkombëtar të drogës dhe korrupsionit shtetëror.
Kapja e Maduros nga forcat amerikane ka shkaktuar reagime të forta ndërkombëtare, veçanërisht nga Kuba, e cila deklaroi se 32 shtetas kubanë u vranë gjatë operacionit amerikan në Venezuelë. Sipas qeverisë kubaneze, viktimat po kryenin misione ushtarake në bashkëpunim me autoritetet venezueliane.
Si pasojë, Havana shpalli dy ditë zie kombëtare, më 5 dhe 6 janar. Mediat amerikane thonë se janë mbi 80 të vrarë nga operacioni për arrestimin e Maduros të shtunën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
