Kampioni i dimrit në Angli dhe gjithashtu pretendenti kryesor për të fituar trofeun në maj është Liverpuli. Skuadra e Jurgen Klop e ka fituar përballjen e vështirë me Arsenalin, që në fushë u dorëzua më lehtë nga çfarë pritej. 5-1 është mbyllur përballja mes dy skuadrave që në këtë sezon luftojnë për objektiva të ndryshëm.
Takimi nuk do të fillonte në mënyrën më të mirë të mundshme për skuadrën e Liverpulit që u gjend në disavantazh që në minutën e 11. Për “topçinjtë” shënoi Ainsley. Por kaq do të ishte Arsenali në këtë përballje, pasi Liverpuli e mori kontrollin e lojës menjëherë në dorë, teksa goli i barazimit do të vinte që në minutën e 14’. Ishte braziliani Roberto Firminjo që barazoi për “the reds”. Ndërsa dy minuta më vonë, sërish Firminjo do e dyfishonte avantazhin, duke bërë shumë më të thjeshtë këtë përballje për Liverpulin. Golin e tretë do e gjente 14 minuta më vonë Sadio Mane. Ndërsa për ta vulosur fitoren do të mendonte egjiptiani Muhamed Salah, që nuk gaboi nga pika e bardhë e penalltisë.
Me rezultatin 4-1, pjesa e dytë e kësaj përballje do të ishte thjesht një formalitet. Por gjithsesi skuadra e Jurgen Klop vijoi sërish të sulmonte për të kërkuar edhe golin e pestë. Ky i fundit të vinte përmes një penalltie që këtë herë u gjuajt nga braziliani Firminjo. Kështu sulmuesi kompletoi tripletën e parë për këtë sezon, që shijon akoma dhe më shumë, pasi skuadra e tij është në krye të tabelës.
Ndërkohë përveç fitores, Liverpuli mund të gëzohet edhe për rezultatet e ekipeve rivale. Pas bllokimit në javët e fundit të Sitit, këtë të shtunë është bllokuar edhe Totenhami. Skuadra e Spurs është mposhtur befasisht nga Uolverhemton në shifrat 1-3.
Më poshtë tabela e të gjitha ndeshjeve të Premier League:
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
