.png)
Kryeministri Edi Rama iu rikthye bashkëbisedimit me qytetarët që e ndjekin në rrjetet sociale, për t’iu përgjigjur pyetjeve që lidhen me masat shtrënguese dhe me paketën e ndihmës ekonomike e sociale të Qeverisë.
Bashkëbisedimi mbërrin në një kohë që kreu i Qeverisë ka premtuar një hapje graduale që pritet që të fillojë që prej të hënës së javës së ardhshme.
Gjatë këtij bashkëbisedimi, Rama konfirmoi se edhe kjo fundjavë do të jetë një izolim i plotë për thuajse 60 orë me përjashtim të atyre që shkojnë në punë.
"Për nesër të shtunë dhe e diel do të jetë e njëjta gjë. Të gjithë në shtëpi pa përjashtim, përveç atyre që janë në punë të lejuara në të shtunë dhe të diel”, deklaroi Rama.
Rama tha se dy rrethet dhe bashkitë që nuk janë prekur nga koronavirusi do të gëzojnë një liri lëvizjeje më të madhe se zonat që konsiderohen si vatra virusi.
Kryeministri Rama bëri të ditur se nga dita e hënë do të ketë lehtësira më të mëdha për disa zona në vend.
“Nga fillimi i javës tjetër, në një sërë zonash të vendit do të kemi një relaksim, krahasuar me Tiranën apo zona të tjera. Qarku i Gjirokastrës do të ketë më shumë lehtësira, po kështu edhe qarku i Dibrës, po kështu, bashkia e Divjakës, po kështu Saranda, Konispoli, Himara, që do të kenë lëvizje me automjet edhe mes njëra-tjetrës, si dhe zonat Pogradec-Përrenjas-Librazhd. Lëvizja fshat-qytet do të jetë më e relaksuar, pensionistët të dalin në një fashë të caktuar në mëngjes, të tjerët në shtëpi. Prindërit me fëmijë, jo më shumë se 10 vjeç, mund të dalin, madje edhe të rinjtë, por duke eliminuar grumbullimet”, deklaroi Kryeministri.
Rama tha se si për strategjinë e ndjekur për testimet dhe gjurmimin e rasteve, ashtu edhe për strategjinë e hapjes është konsultuar edhe me ekspertë të huaj.
“Kemi patur një bashkëbisedim mjaft të dobishëm me grupin e ekspertëve gjermanë, me në krye institutin e shëndetit gjerman. Po ju them edhe njëherë: harrojini shembuj si Gjermania, Suedia, e të tjerë. Edhe me ekspertët gjermanë kemi konfirmuar strategjinë tonë, si për masat, si për testet. Dëgjoni vetëm ekspertët, vetëm ata që kanë mandat dhe mbajnë përgjegjësi për ato që thonë”, u shpreh ai.
Kryeministri përsëriti se normaliteti që njihnim para përhapjes së pandemisë nuk do të kthehet për një kohë të gjatë.
“Nuk ka më dhënie dore, nuk ka më turruni të gjithë në autobus, nuk ka shko në plazh me valë avujsh djerse. Nuk ka më, nuk ekziston. Do të dalim, por do të bashkëjetojmë me virusin. Nëse nuk e bëjmë këtë rrezikojmë shumë”, u shpreh ai.
Më pas, kryeministri Edi Rama, përmes një postimi në Facebook, publikoi se si do të veprohet duke nisur nga e hëna, 27 prill, lidhur me lëvizjen e qytetarëve fdhe automjeteve në rrugë.
Sipas tij, duke nisur nga dita e hënë, në disa qarqe dhe qytete të vendit do të ketë lehtësira, por me rregulla strikte për lëvizjen.
Postimi i plotë i Ramës:
"Ja zonat e gjelbërta ku nga e hëna 27 prill do të ketë një lehtësim të posaçëm të lëvizjes, por me rregulla strikt për lëvizjen:
• Qarku Dibër
• Qarku Gjirokastër
• Zona e Përbashkët e bashkive Pogradec, Prrenjas, Librazhd
• Zona e Përbashkët e bashkive Sarandë, Himarë, Konispol, Finiq
• Bashkia Divjakë
Në zonat e gjelbërta automjetet private do të lëvizin pa autorizim nga ora 09.30 deri në orën 17.30, por me rregullin e vetëm 2 personave në makinë, nga i cili përjashtohen kategorikisht pensionistët!
Ndalohet rreptësisht hyrje-dalja në perimetrin e këtyre zonave.
Pensionistët do të lëvizin lirisht në këmbë, deri në orën 08.30 dhe deri në këtë orë asnjë këmbësor tjetër përveç atyre që kanë autorizim për punë, ndalohet të dalë nga shtëpia
Nga ora 9.30 deri në 17.30 të gjithë të tjerët mund të dalin nga shtëpia.
Kujdes! Ndalohet lëvizja në këmbë e më shumë se dy personave
Ndalohet rreptësisht qëndrimi në një vend i më shumë se dy personave dhe nuk lejohet frekuentimi i parqeve publike në 14 ditët e ardhshme.
*Apeli im për të gjithë qytetarët e këtyre zonave është që të bëjnë më të mirën, duke garantuar me sjelljen e tyre kushtet e sigurisë për veten e të tjerët, në mënyrë që të mos kthehemi mbrapsht për shkak të shkeljeve në këto zona dhe po ashtu, të ndihmojnë të gjithë Shqipërinë me shembullin e tyre pozitiv".
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
