.png)
Gjykata ka vendosur masën e sigurisë “arrest me burg” për ish-truprojën e ish-ministrit Saimir Tahiri, Hekuran Marku. Ai akuzohet për trafik ndërkombëtar droge.
Marku u ndalua në Gjermani, nga ku u ekstradua pas kërkesës së Prokurorisë së Posaçme. Emri i Markut doli në operacionin ndërkombëtar të koduar “Shpirti”. Si pasojë e këtij operacioni janë vendosur në pranga biznesmenë, prokurorë dhe zyrtarë të lartë të Policisë së Shtetit, të akuzuar si pjesëmarrës në veprimtaritë kriminale të drogës.
Marku rezulton sipas SPAK i përshirë në këtë skemë së bashku me ish-truprojën tjetër të Tahirit, Agustin Deda. Ky i fundit është i lirë në Francë pasi ka kërkuar azil politik dhe autoritetet atje janë duke shqyrtuar kërkesën e tij.
Sipas SPAK, 2 truprojat kanë bashkëpunuar edhe me 4 italianë dhe një shqiptar për të trafikuar rreth 1 ton kanabis drejt Italisë.
Kjo sasi droge u sekuestrua më pas në Bari ku u vendosën në pranga 2 persona. Në dosje thuhet se Marku dhe Deda kishin kultivuar drogën në disa parcela në Tepelenë dhe ishin kujdesur për transportin e tyre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
