Libri i ish-lojtarit anësor të Çikago Bulls, Skoti Pipen, që del në shitje më 9 nëntor, është një akuzë e fortë për më të mirin e të gjitha kohërave në NBA, Majkëll Xhordan. Ky i fundit përshkruhet nga Pipen si hipokrit dhe i pandjeshëm. Në libër ka për të gjithë, duke filluar nga trajneri Fill Xhekson.
Pipen kundër Xhordan. Kundër të gjithëve, në fakt, por lajmi bën bujë kur ai vë në shënjestër ish-shokun e skuadrës te Çikago e kohëve të arta, mitikun Majkëll Xhordan. Libri i Skoti Pipen, për 18 sezone protagonist në NBA dhe tani në “Hall of Fame”, është një bombë nga përmbajtja.
Te “Unguarded”, Pipen akuzon hapur Xhordanin, për shumë lojtari më i mirë i çdo epoke.
“Si pati guximin të na trajtonte kështu te “The Last Dance”, – dokumentari i prodhuar nga ESPN, – mua dhe lojtarët e tjerë të kohës, pas gjithë asaj që kemi bërë për të dhe markën e tij të çmuar? “The Last Dance” glorifikon atë dhe nuk na vlerëson ne”, – shkruan Pipen në libër.
Pipen më tej e rrit dozën e kritikave: “Të rishoh në video se si i trajton keq kolegët e tij, më dridhet trupi, edhe tani si atëherë. Më ka quajtur ‘shoku më i mirë i skuadrës’. Nuk mund të ishte më mendjemadh se kaq. Sa naiv jam treguar, duke pritur diçka ndryshe…”.
Hipokrit dhe i pandjeshëm. Ky është portreti i Xhordan, sipas Pipen. “Unë dhe ai nuk kemi qenë kurrë miq”, – shkruan Skoti Pipen. Dhe të mendosh që ai dhe Xhordan kanë triumfuar 6 herë bashkë. Ata kanë luajtur në krah të njëri-tjetrit nga viti 1987 deri në 1993-shin dhe pastaj nga 1995-a në 1998-ën. Ishin fytyrat e dinastisë së Bullsave, por me sa duket, poshtë krevatëve të asaj skuadre paska pasur shumë pluhur.
Pipen në libër ka për të gjithë, nuk kursen askënd. Për Çarls Barklein ka thënë: “Nuk ishte edhe aq i dhënë për të fituar një titull”. Bujë kanë bërë edhe fjalët për trajnerin Xhekson, të cilin më parë e ka quajtur racist, sepse në fundin e një ndeshjeje në 1994-ën kishte bërë një skemë për Toni Kukoç dhe jo për të. Në libër Pipen nuk kthehet te kjo çështje, por shprehet se Xhekson e ka braktisur në momentin e së vërtetës.
Sigurisht, thelbi i librit ka të bëjë me akuzat ndaj Xhordan. Në disa pjesë të librit të publikuara nga “Neë York Times”, shkruhet: “Kemi fituar 6 unaza, edhe pse ai sillej keq me shokët e skuadrës. Nuk më shqetëson fakti që përmbajtja e librit na ndan përfundimisht.
Për t’i përkeqësuar gjërat, për “The Last Dance”, që e ka prezantuar si historinë e tij, jo atë të Bullsave, ai ka marrë 10 milionë dollarë, ne asnjë qindarkë. Ishte shumë i shqetësuar se ndoshta tifozët e kësaj gjenerate mund të konsiderojnë LeBron Xhejmsin si më të madhin. Prandaj ka dashur t’u tregojë të gjithëve të shkuarën, që e nxjerr si më të mirin”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
