Ministri i Jashtëm rus, Sergey Lavrov, ka përmendur sërish rastin e Kosovës në lidhje me referendumet e rreme të organizuara në rajonet e pushtuara nga Rusia në Ukrainë, Donetsk, Luhansk, Zaporozhzhia dhe Kherson.
Në një intervistë për gazetën ruse “Argumenty i Fakty”, ai ka thënë se rasti i Kosovës në Gjykatën Ndërkombëtare të Drejtësisë ka vendosur precedent.
“Çështja nëse referendumet janë në përputhje me Kushtetutën dhe legjislacionin e Ukrainës nuk ndikon në kualifikimin e tyre sipas ligjit ndërkombëtar. Kujtojmë vendimin e vitit 2010 për Kosovën të miratuar nga Gjykata Ndërkombëtare e Drejtësisë. Sipas këtij vendimi, një territor nuk e ka për detyrë t’u drejtohet autoriteteve qendrore të vendit të tij për leje për të shpallur sovranitetin e tij kur zbaton të drejtën e tij për vetëvendosje. Kjo krijoi një precedent”, u shpreh Lavrovi në këtë intervistë.
Ai tha se “partnerëve tanë të huaj”, duke iu referuar Serbisë dhe Kazakistanit, do t’u duhet kohë të kuptojnë realitetet e reja gjeopolitike.
“Ne nuk do të detyrojmë askënd të nxitojë. Prioriteti ynë është zbatimi i rezultateve të votës së lirë në territoret e çliruara në përputhje me normat themelore të së drejtës ndërkombëtare, në radhë të parë të drejtën e popullit për vetëvendosje”, deklaroi kryediplomati rus.
Lavrovi u shpreh se rusët dhe rusishtfolësit në territorin e Ukrainës janë përballur me “shtypje të ashpër” nga “regjimi i Kievit pas grushtshtetit të vitit 2014”.
“Është e qartë se autoritetet në Kiev nuk përfaqësojnë popullin e Donbassit dhe rajoneve Zaporozhzhia dhe Kherson”, theksoi Sergey Lavrov./Zëri
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
