.png)
Nga Gazeta ‘Si’- Kreu i ‘Nismës Shqipëria Bëhet’, Adriatik Lapaj ka denoncuar në Gjykatën e Posaçme për shpifje, Agron Shehajn.
Në dyert e GJKKO-së, Lapaj është shprehur për gazetarët se ka të paktën tetë raste të dokumentuara të shpifjes.
Ai ka deklaruar se nuk e dëshironte një konflikt të tillë me Shehajn, veçanërisht me partitë e reja, pasi kjo gjë sipas tij gëzon kryeministrin Edi Rama.
Lapaj deklaroi se Shehaj ka pretenduar në media se ai si avokat ka përfaqësuar kompani të krimit që janë sekuestruar nga SPAK dhe se ai ka marrë para nga këto kompani. Ai i bëri thirrje Shehajt që të verifikojë në gjykatë pretendimet e tij.
“Unë i kam dhënë kohë zotit Shehaj prej një muaji, por edhe vetes, për të reflektuar, sepse nuk e kam dashur këtë konflikt, sepse ai që fërkon barkun në këtë konflikt është Edi Rama. Por Shehaj e kërkoi me qiri, duke pretenduar se paskemi gjëra për të fshehur dhe frikë.
Unë nuk kam pasur frikë nga Edi Rama dhe Berisha, jo nga Agroni. Unë nuk kam dashur të krijojë një kurs konflikti mes të resë, por kush kërkon luftë, luftë do gjejë. Si ta kërkojë, ashtu do e gjejë. Sot po dorëzoj si akuzues i dëmtuar padinë pranë Gjykatës së Posaçme dhe Shehaj duhet të vijë këtu të provojë pretendimet.Unë Adriatik Lapaj, as nëna as babai dhe asnjë familjar I rrethit të parë timin nuk ka asnjë metër tokë në Republikën e Shqipërisë.
Ka të paktën tetë shpifje ndaj meje”, tha Lapaj.
Sipas Shehajt, Lapaj është përfshirë në çështje pronash në bregdetin e Shqipërisë.
Shehaj ka deklaruar se Lapaj përfshihet ose si ndërmjetësues investimesh strategjike, ose si përfaqësues kompanie që pastron para krimi për të marrë prona në Ksamil që vjehrri i tij i kishte gjykuar si kryetar i Gjykatës së Sarandës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
