Gazeta Si – Laçi shmang humbjen në Moldavi ndaj Petrokub. Kjo ndeshje ka përfunduar me rrjeta të paprekura, por barazimi merr vlera edhe më të mëdha, sepse ekipi shqiptar luajti me 10 vetë për më shumë se 60 minuta. Portieri dhe mbrojtja kanë meritat kryesore për barazimin.
Pa u mbushur 30 minuta lojë, kurbinasit mbetën me 10 vetë. Spahiu u ndëshkua me dy kartonë të verdhë dhe e la skuadrën e tij me 10 vetë, duke ia vështirësuar jo pak punën në këtë transfertë.
Në fundin e pjesës së parë Laçi ishte me fat. Portierit Dajsinani i erdhi në ndihmë traversa, pas një gjuajtje nga jashtë zonës së Turcan.
Trajneri Shpëtim Duro ndërhyri nga stoli pas minutës së 65-të, duke hedhur në fushë Çuçin, Babatunde dhe sulmuesin Guindo, i cili e nisi nga stoli këtë ndeshje. Barazimi pa gola, duke pasur parasysh si shkoi ndeshja, është pozitiv. Laçi ka shanse reale për të kaluar në turin e tretë të Ligës së Konferencës.
Shkëndija e Tetovës fitoi në transfertën letoneze ndaj Valmieras. Për tetovarët shënuan Doriev dhe sulmuesi shkodran Sindrit Guri. Me këtë fitore, Shkëndija hedh një hap të sigurt drejt kualifikimit në turin e tretë të Ligës së Konferencës.
Një rezultat të mirë arriti sot edhe Drita. Kosovarët barazuan 0-0 në transfertë ndaj belgëve të Antverp, ku luan edhe mesfushori i njohur Radxha Naingolan.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
