.png)
Për mesfushorin e kombëtares shqiptare të futbollit, Qazim Laçin skuadra është gati për të nisur rrugëtimin në Kampionatin Europian, Gjermani 2024 dhe po përgatitet çdo ditë e më shumë për ndeshjet me Italinë, Kroacinë e Spanjën.
28-vjeçari shqiptar deklaroi në konferencën për mediet në prag të ndeshjes debutuese në EURO2024 ndaj Italisë, që luhet më 15 qershor në “Signal Iduna Park” në Dortmund se takimi i parë është i rëndësishëm për çdo skuadër si dhe është ndeshja me më shumë presion.
Teksa sa i përket konkurrencës mes reparteve, Laçi shtoi se është pozitive dhe se në fund edhe nëse luajnë titullar, por edhe nëse luajnë vetëm një minutë rëndësi ka që të japin maksimumin në çdo ndeshje.
Si keni punuar dhe a do luani nga minuta e parë? “Kemi punuar shumë mirë, organizimi është shumë i mirë nga stafi e federata. Kemi punuar shumë mirë dhe vazhdojmë të punojmë që të jemi gati për ndeshjen me Italinë. Kush do të jetë titullar e vendos trajneri, të gjithë lojtarët janë gati e po punojnë shumë fortë, nëse luajmë nga minuta e parë apo luajmë vetëm një minutë nuk ka rëndësi, të gjithë jemi në dispozicion të trajnerit.”
Përplasja mes mesfushave sepse si Italia ashtu edhe Shqipëria janë shumë mirë në këtë repart? “Do të jetë një përballje shumë e vështirë. Që kur u hodh shorti e dinim që do të ishte një ndeshje shumë e rëndësishme për ne. Të gjithë lojtarët po japin maksimumin dhe janë shumë të motivuar dhe të fokusuar te kjo ndeshje dhe do luftojmë deri në fund për të dhënë maksimumin.”
Sa do peshojë fati i Shqipërisë në ndeshjen e parë? “Ndeshja e parë është gjithmonë më e vështira për të gjitha ekipet si për ne edhe për Italinë. Ne kemi arritur me shumë meritë këtu, kemi punuar shumë dhe në kualifikuese kemi dhënë maksimumin. Kështu do vazhdojmë edhe më tej, jemi stërvitur shumë dhe atë do bëjmë edhe në ndeshje, ne duam të marrim maksimumi e pikëve në ndeshjen e parë.”
Konkurrenca në reparte mes lojtarëve a ndjehet në Kombëtare? “Është një konkurrencë shumë pozitive, të gjithë lojtarët janë të barabartë. Kombëtarja ka marrë lojtarët më të mirë, por ka shumë konkurrencë të madhe në çdo repart, por të gjithë do të japin maksimumin për Kombëtaren aty e kemi vëmendjen, që të ecim sa më lart.”
Me cilën nga tre skuadrat pret me më tepër dëshirë që të përballesh? “Të tre janë shumë të fortë, kanë cilësi dhe është shumë e vështirë të bësh një zgjedhje. Për mendimin e tij çdo ekip ka lojtarë me diferenca dhe tiparet e veta, rëndësi ka që të marrim çdo ndeshje me radhë dhe me shumë interes.”
Si ndjeheni para ndeshjes me Italinë? “Jemi gati, të gjithë lojtarët janë gati. Shyqyr nuk kemi pasur dëmtime kjo është kryesorja. Ndeshja e parë do jetë pak me stres, pasi dihet, por besoj dhe e di që të gjithë lojtarët janë shumë të motivuar dhe kjo është pozitive për ne.”
A keni marrë këshilla nga lojtarët që kanë qenë në EURO 2016? “Nuk kanë thënë diçka specifike, por është e vërtetë që me eksperiencën që kanë na kanë ndihmuar shumë në stërvitje, për t’u përballur në ndeshjen me Italinë dhe në ndeshjet e tjera.”
Sa presion ka Shqipëria në këtë grup? “Në kualifikuese në kemi dhënë maksimumin, e mbaruam në vendin e parë sepse e merituam. Në Europian në ndeshjet që na presin ne do mbërrijmë me këmbë në tokë. E dimë që kemi kundërshtarë shumë të fortë, por ne do ta shijojmë dhe do japim maksimumin, pasi kjo fanellë vlen shumë.
Shqipëria është pjesë e Grupit B së bashku me Italinë, Kroacinë e Spanjën, me të cilat do të përballet respektivisht në datat 15 qershor, 19 qershor dhe 24 qershor. /supersport
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
