“Qeveria e Kosovës po reagon me vonesë dhe pa takt në krizame të cilat së fundmi po përballet Kosova, qoftë në krizën energjetike, apo tani atë të rritjes së çmimeve”, tha deputetja e Lidhjes Demokratike të Kosovës, Hykmete Bajrami, teksa prezantoi temën për të cilën u thirr seanca e jashtëzakonshme parlamentare që po mbahet të martën.
“Sot ngritja e çmimeve është pandemia e dytë, nuk ka produkt që nuk i është ngritur çmimi”, tha deputetja Bajrami.
Partitë opozitare: Lidhja Demokratike e Kosovës, Partia Demokratike e Kosovës dhe Aleanca për Ardhmërinë e Kosovës kanë thirrur seancën e jashtëzakonshme parlamentare për rritjen e çmimeve.
Deputetja Bajrami tha se Qeveria e Kosovës ka shkelur Kushtetutën, duke ndërhyrë në tregun e lirë, me qëllim që të zbusë ndikimin e rritjes së çmimeve.
Ndërkaq, ajo përmendi rritjen e çmimeve të karburanteve dhe atë të vajit. Te rasti i fundit, ajo pranoi se disa kompani kanë keqpërdorur situatën, por tha se ekzekutivi nuk duhet ta godasë të gjithë sektorin privat.
Bajrami kritikoi edhe reagimin e Qeverisë për krizën energjetike dhe tha se këtë muaj do të ndihet pesha e rritjes së tarifave të energjisë elektrike dhe e ftoi që të marrë praktikat e shteteve në rajon që qytetarët ta tejkalojnë më lehtë krizën me energjinë dhe rritjen e çmimeve.
Ndërkaq, shefja e Grupit Parlamentar të partisë në pushtet, Lëvizjes Vetëvendosje, Mimoza Kusari-Lila, kritikoi opozitën se po tenton që të paraqesë ekzekutivin si joaktiv ndaj ngjarjeve që po ndodhin në Kosovë dhe botë.
Ajo tha se kriza që ka goditur botën për shkak luftës në Ukrainë, pashmangshëm që e ka prekur Kosovën.
“Është e padrejtë që të akuzohet kjo Qeveri për mosaktivitet apo mosreagim”, tha Kusari-Lila.
Duke folur për rritjen e çmimeve të vajit dhe produkteve të tjera ushqimore nga disa operatorë ekonomikë, Kusari-Lila tha se “ato kompani i bën ato lëvizje për përfitime komerciale, ju sot po e bëni këtë debat për përfitim politik”.
Kryetar i Partisë Demokratike të Kosovës, Memli Krasniqi, tha se Qeveria nuk ka plan për ta zbutur krizën ekonomike. Sipas tij, lufta në Ukrainë ka krijuar çrregullime në treg, por sipas tij, ekzekutivi duhet të gjejë zgjidhje.
“Nuk keni plan për këtë situatë”, iu drejtua Krasniqi Qeverisë, duke shtuar se bazuar në situatën e krijuar, Qeveria duhet të rrisë me urgjencë rezervat shtetërore.
Ndërkaq, kryetari i LDK-së, Lumir Abdixhiku, tha se kërkojnë reduktimin e akcizës, të Tatimit mbi Vlerën e Shtuar për lëndën e parë, në mënyrë që kriza të tejkalohet.
Ai tha se Kosova është duke u përballur me rritjen më të madhe të inflacionit brenda vitit.
Agjencia e Statistikave të Kosovës ka bërë të ditur se norma vjetore e inflacionit e matur në muajin shkurt, 2022, me muajin shkurt, 2021, ishte 7.5 për qind.
Abdixhiku e akuzoi Qeverinë e Kosovës se nuk po e sheh që ka krizë dhe tha se ekzekutivi “nuk ka se si ta zgjidhë atë”.
Çmimi i vajit më 9 mars ishte ngritur në 3.49 euro për litër nga rreth 2 euro sa ishte më 8 mars. Për shkak të dyshimeve se operatorët ekonomikë po bëjnë veprime për mashtrimin e konsumatorëve, Inspektorati i Tregut në Kosovë tha se ka mbyllur përkohësisht depo të operatorëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
