Parlamenti i Bullgarisë ka votuar zyrtarisht Kiril Petkov si kryeministër të ardhshëm të vendit, duke i dhënë fund një krize politike disa mujore. Deputetët zgjodhën udhëheqësin 41-vjeçar të qendrës, me 134 vota por dhe 104 kundër.
Në një votim të veçantë, ligjvënësit miratuan gjithashtu qeverinë e re të vendit të udhëhequr nga qendra, një koalicion i drejtuarnga partia anti-korrupsion e Petkov, “Ne Vazhdojmë Ndryshimin”, PP, dhe tre grupe politike.
PP, Partia Socialiste Bullgare e krahut të majtë, partia kundër elitës “Ka një popull të tillë” dhe grupi liberal, Bullgaria Demokratike, së bashku kontrollojnë 134 vende në parlamentin 240 vendesh të Bullgarisë. Vendi ka duruar 8 muaj kaos politik dhe 3 zgjedhje brenda një viti.
Në votimin e fundit në nëntor, partia PP e Petkov doli si fituese e befasishme ndaj partisë konservatore GERB, e cila pati dominuar politikën bullgare në dekadën e fundit. Petkov, një sipërmarrës i shkolluar në Harvard, ka qenë i emëruar më parë si ministër i ekonomisë në qeverinë e përkohshme të Bullgarisë.
Të hënën, ai njoftoi se transparenca në shpenzimet publike, zero toleranca për korrupsionin dhe reformat në gjyqësor do të jenë gurët kyç të kabinetit të tij. Petkov u zotua gjithashtu të mbajë Bullgarinë në një rrugë pro-europiane dhe pro-NATO-s.
Prioritete të tjera të qeverisë së re përfshijnë trajtimin e krizës demografike, rritjen e kostos së jetesës dhe shkallën e ngadaltë të vaksinimit kundër Covid-19. Më pak se 30 % e popullsisë së rritur të Bullgarisë janë vaksinuar plotësisht kundër koronavirusit – shkalla më e ulët në Bashkimin Europian.
Burimi:EuroNews/Gazeta “SI”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
