.png)
Gazeta Si – Karol Nawrocki, një politikan polak nga partia e ekstremit të djathtë, Ligj dhe Drejtësi (PiS), ka fituar zgjedhjet presidenciale dhe do të jetë presidenti i ri i Polonisë. Ai do ta fillojë mandatin e tij më 6 gusht.
Nawrocki ka lindur në Gdańsk, është 42 vjeç dhe ishte praktikisht i panjohur përpara se të zgjidhej nga “Ligj dhe Drejtësi” në nëntor 2024 si kandidat për zgjedhjet presidenciale polake.
Gjatë gjithë karrierës së tij, ai ishte mbi të gjitha një intelektual i afërt me Ligjin dhe Drejtësinë dhe vetëm gjatë fushatës zgjedhore fitoi famë dhe madje një farë karizmi.
Nawrocki ka një doktoraturë në histori dhe në studimet e tij ai u mor kryesisht me rolin e Bashkimit Sovjetik në historinë e Polonisë bashkëkohore dhe Solidarność-in, sindikatën e famshme të Lech Walesa-s, i cili u bë president në vitin 1990: “Ai e shkroi tezën e tij brenda një viti, bazuar në 158 dëshmi. Ishte një nxënës i mirë, i aftë të angazhohej shumë”, tha për gazetën “Le Monde” mësuesi i tij në atë kohë, Grzegorz Berendt, i cili tani është pjesë e komitetit kombëtar që mbështeti Nawrocki-n për presidencën. Ai e përshkruan atë si një person me “karakter të fortë, një luftëtar”.
Midis viteve 2017 dhe 2021, Nawrocki drejtoi Muzeun e Luftës së Dytë Botërore në Gdańsk, përpara se të merrte përsipër presidencën e Institutit të Kujtesës Kombëtare, qëllimi i të cilit është të kryejë kërkime historike mbi krimet e kryera në Poloni gjatë Luftës së Dytë Botërore dhe periudhës komuniste, e cila përfundoi në vitin 1989.
Puna e tij ka pasur gjithmonë një konotacion të fortë politik antisovjetik dhe në përgjithësi kundër partive që i atribuohen të majtës.
Që nga viti 2018, Instituti është bërë në fakt një nga instrumentet kryesore për rishkrimin e kujtesës së iniciuar nga PiS, në një kuptim konservator.
Partitë që janë aktualisht në qeveri e akuzojnë Nawrocki-n se ka dhënë një kontribut të madh në këtë drejtim.
Përpara këtyre zgjedhjeve, Nawrocki nuk kishte përvojë politike dhe në fillim të fushatës zgjedhore vuajti për këtë gjë: ai shmangu pyetjet e gazetarëve dhe foli pak.
Në muajt e fundit, ai është përfolur edhe në lidhje me disa skandale që e përfshijnë: për shembull, doli në dritë historia e një shtëpie të dytë që dyshohet se e kishte blerë me një çmim shumë më të ulët se ai i tregut nga një person i moshuar me aftësi të kufizuara, megjithëse gjatë fushatës zgjedhore, ai kishte deklaruar se kishte vetëm një shtëpi “si shumica e polakëve”.
Nawrocki është gjithashtu një boksier amator dhe disa dokumente kanë zbuluar afërsinë e tij me një grup të organizuar boksierësh dhe rojesh pranë qarqeve neonaziste.
Faqja e lajmeve “Onet” më vonë e akuzoi atë për drejtimin e një rrjeti prostitucioni, ndërsa punonte në një hotel në Sopot, një vendpushim bregdetar në Detin Baltik, jo shumë larg Gdanskut.
Megjithatë, rasti më sureal kishte të bënte me identitetin e dyfishtë që Nawrocki kishte krijuar për veten e tij për të shkruar dhe promovuar librin e tij.
Gjatë fushatës zgjedhore, u zbulua se në vitin 2018 Nawrocki kishte botuar një libër për një kriminel polak të viteve 1990, Nikodem “Nikoś” Skotarczak, duke u shtirur si një autor që nuk ekziston, Tadeusz Batyr.
Nawrocki kishte shkruar në rrjetet sociale se e kishte takuar Batyrin personalisht; në disa intervista, Batyr pohoi se ishte frymëzuar nga vepra historike e Nawrocki-t për punën e tij, duke e lavdëruar atë shumë.
Në njërën nga këto intervista, Batyr/Nawrocki foli me një zë të maskuar dhe një imazh të turbullt, në mënyrë që të mos njihej.
Videoja kishte qarkulluar në internet gjatë disa javëve të fundit, me shumë njerëz që e tallnin atë për këtë marifet të ngathët publicitar.
Pasi pranoi se ai ishte me të vërtetë personi që fshihej pas emrit Tadeusz Batyr, Nawrocki shpjegoi se epiteti ishte për ta mbrojtur atë nga hakmarrjet e krimit të organizuar dhe se “pseudonimet letrare” nuk ishin “asgjë e re”.
Megjithatë, kopertina nuk ishte aq e padepërtueshme: Tadeusz është emri i tij i dytë. Nawrocki ka qëndrime shumë konservatore që në disa raste i tejkalojnë ato të partisë që e mbështeti atë.
Ai është kategorikisht kundër abortit, por edhe kundër kontracepsionit të emergjencës dhe bashkimeve civile midis njerëzve të të njëjtit seks.
Ai e quajti Rusinë një “shtet barbar”, por në të njëjtën kohë është kundër hyrjes së Ukrainës në Bashkimin Evropian dhe NATO.
Slogani i fushatës së tij ishte “Polonia e para, polakët të parët” dhe ai shpesh kritikonte ndihmën dhe mbështetjen e dhënë refugjatëve ukrainas që jetonin në vend, duke shpjeguar ndër të tjera se, “në radhët jashtë zyrave të mjekëve dhe spitaleve”, polakët duhet të “kenë përparësi”.
Ai gjithashtu kritikoi Ukrainën për dështimin për të “treguar mirënjohje për atë që polakët kanë bërë” dhe akuzoi Presidentin Volodymyr Zelensky për “paturpësi” ndaj Polonisë.
Naërocki është gjithashtu kritik ndaj Bashkimit Evropian, shpesh ka sulmuar rolin e Francës dhe Gjermanisë në Evropë, është kundër Paktit të Gjelbër dhe ka marrëdhënie të mira personale me presidentin e SHBA-ve Donald Trump, të cilin e ka takuar disa herë.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
