.png)
Gazeta Si – “Zoti kancelar, a keni pirë ndonjëherë ndonjë cigare hashash?” pyet intervistuesi i TV Sat.1/ProSieben, Olaf Scholzin, njeriu në krye të qeverisë që miratoi legalizimin e kanabisit në vendin më të populluar në Evropë. Drita jeshile nga ekzekutivi mbërriti një javë më parë, por tashmë “topi” i kalon Bundestagut (Parlamenti gjerman).
Por së shpejti – ndoshta në fillim të vitit 2024 – përdorimi rekreativ i kanabisit nuk do të jetë më një krim as në Gjermani.
Nuk do të thotë se do të liberalizohet plotësisht: ka më shumë se një kufizim, sepse “duhani është ende i rrezikshëm”, nënvizon ministri i Shëndetësisë, Karl Lauterbach. Prandaj, drita jeshile për posedimin e substancës, por me një kufi prej 25 gramësh për person.
E njëjta gjë edhe për kultivimin, por maksimumi tre fidanë për person. Legalizohen edhe “klubet e kanabisit”, pra grupe të përbëra nga maksimumi 500 persona, të cilët do të lejohen të kultivojnë fidanë (por jo për qëllime komerciale) dhe të shpërndajnë maksimumi 25 gramë çdo ditë, dhe deri në 50 gramë çdo muaj për çdo anëtar.
Kufijtë, për ata nën 21 vjeç janë edhe më të rrepta: më të rinjtë do të mund të marrin maksimumi 30 gram në muaj dhe me një përmbajtje “Thc – tetrahidrokanabinol”, përbërësi aktiv i kanabisit – që nuk i kalon 10 për qind.
“Kujdes: fakti që mund të pini 50 gramë në muaj, nuk do të thotë se duhet t’i pini të gjitha”, paralajmëron Lauterbach.
Megjithatë, ai e konsideron ligjin e sapomiratuar si “përpjekjen më të mirë për legalizimin e deritanishëm” dhe saktëson se synimi është mbi të gjitha “ulja e vëllimit të tregut të zi dhe krimeve që lidhen me trafikun e drogës”.
Reforma, tani për tani, nuk i pëlqen, si atyre që e konsumojnë, ashtu edhe ata që e kundërshtojnë substancën.
Opozita akuzon qeverinë se dëshiron të legalizojë një “drogë të rrezikshme”, pavarësisht mendimit të shumë mjekëve.
Ndërsa anëtarët e parë të “klubeve” të sapolindur, argumentojnë se lidhjet e ligjit janë shumë të ngushta dhe se asgjë nuk është bërë kundër “stigmatizimit” të konsumatorëve.
Ndërkohë, shtypi përfiton nga rasti për të shkuar e për të rimarrë deklaratat e vjetra të ministrave ose, akoma më mirë, për t’i pyetur drejtpërdrejt nëse kanë përdorur ndonjëherë substancën në fjalë.
Me pak fjalë, a i ka lejuar ndonjëherë Scholz vetes një tymosje? “Jo, unë kurrë nuk kam pirë bar”, u përgjigj lideri socialdemokrat në një intervistë të transmetuar të dielën në mbrëmje.
Fjalë që kanë ngritur më shumë se një dyshim, duke përfshirë atë të “Frankfurter Allgemeine Zeitung”, sipas së cilës, “është e vështirë të besohet se një revolucionar i vjetër, i rritur në Jusos (organizata rinore e SPD-së), nuk ka provuar kurrë një cigare hashash i vogël”.
Jo se ministrat e tjerë kanë qenë më të besueshëm. Mes njërit, “është çështje private” dhe një tjetri “pa koment”, të paktë janë ata që janë përgjigjur sinqerisht.
Para së gjithash, vetë Lauterbach, i cili në të kaluarën i tha gazetës prestigjioze, “Bild”: “E kam provuar intensivisht, sepse një mjek i mirë provon gjithçka. Por ishte hera e parë dhe e fundit”.
Ashtu si ai, ministrja e Jashtme, Annalena Baerbock, e cila megjithatë ishte e zhgënjyer nga hashashi dhe vendosi se “nuk është për mua”.
Ndërsa Cem Özdemir, ministër i Bujqësisë, pranoi se madje ka rritur disa fidanë në ballkonin e tij: “Ta themi kështu: unë nuk jam krejtësisht i huaj për tymosjen e hashashit”.
Për këtë rast, edhe fjalët e liderëve të huaj janë pluhurosur, veçanërisht ato të Shteteve të Bashkuara të Amerikës.
Barack Obama, për shembull, shkroi në një autobiografi të vjetër se ai kishte bërë “përdorim të shpeshtë” të marijuanës kur ishte i ri.
Dhe si mund ta harrohet përgjigja ndaj pyetjes fatale – “E provove apo jo?” — të cilën Bill Klinton e dha gjatë fushatës zgjedhore të vitit 1992: “Po, disa herë, por nuk më pëlqeu. Dhe gjithsesi nuk e kalova poshtë…”.
Ndërsa Johnny Carson, drejtuesi legjendar i “Tonight Show”, e kaloi me një shaka: “Ky është problemi i demokratëve. Edhe kur bëjnë diçka të gabuar, nuk mund ta bëjnë atë siç duhet”.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
