.png)
“Njerëzit e moshuar do të duhet të bëjnë sakrifica në luftën kundër ndryshimit të klimës ose fëmijët që rriten sot do të përballen me një të ardhme të keqe duke luftuar për ujë dhe ushqim” ka paralajmëruar Frans Timmermans zëvendës shefi i BE.
Duke e vënë theksin tek klima, Timmermans, nënkryetar i komisionit të BE, tha se nëse politika sociale dhe politika klimatike nuk kombinohen, për të ndarë në mënyrë të drejtë kostot dhe përfitimet e krijimit të një ekonomie me karbon të ulët, bota do të përballet me një reagim të ashpër nga njerëzit që kanë frikë të humbasin vendet e punës ose të ardhurat, të nxitur nga politikanë populistë e me interesa për karburantet fosile.
“Nuk është vetëm një çështje urgjente, është një çështje e vështirë. Ne duhet ta transformojmë ekonominë tonë. Ka përfitime të mëdha, por është një sfidë e madhe. Kërcënimi më i madh është ai social. Nëse nuk e rregullojmë këtë, fëmijët tanë do të luftojnë për ujë dhe ushqim. Nuk ka asnjë dyshim”,shpjegoi ai.
Trajtimi i ndryshimeve klimatike do të jetë shumë herë më i lirë sesa përçarja që do të shkaktojë ngrohja globale, si dhe sjellja e përfitimeve për shëndetin dhe kostot kanë rënë në mënyrë dramatike në vitet e fundit. Sidoqoftë, largimi nga karburantet fosile do të thotë fundi i disa punëve tradicionale siç është miniera e qymyrit dhe kostot e ndryshimit do të bien në mënyrë të pabarabartë në sektorë të ndryshëm të shoqërisë, nëse politikanët nuk ndërhyjnë.
Timmermans tha se do të duheshin sakrifica nga brezi i vjetër për të siguruar që të rinjtë të mund të jetojnë në një mjedis të sigurt. Njerëzit e moshuar sot ishin përfituesit e sakrificës së një brezi të mëparshëm dhe sipas tij tani u takon atyre të bëjnë ndryshime.
“Ndonjëherë pyes veten nëse jemi të vetëdijshëm për transformimin që po shkojmë dhe sa i thellë është ai. Është një përpjekje e krahasueshme me ristrukturimin pas një konflikti të dhunshëm. Unë flisja me gjyshërit dhe prindërit e mi se si ata e panë këtë, pas luftës. Ata thanë, ‘Epo, ne sakrifikuam shumë sepse e dinim që fëmijët tanë do të ishin më mirë.’ Dhe kjo ndjenjë nuk është më në shoqërinë tonë”, shtoi ai.
Paralajmërimet e Timmermans pasqyrojnë një shqetësim të madh mes ekspertëve të klimës se politikanët nuk kanë arritur t’u tregojnë njerëzve përfitimet e një shoqërie me pak karbon, të cilat përfshijnë ajër dhe ujë më të pastër, qytete me standarde jete më të mirë dhe nivele më të mira të shëndetit dhe mirëqenies, si dhe kriza e klimës. Timmermans shpjegoi se disa njerëz në industritë tradicionale do të duhet të ndryshojnë dhe tha se roli kryesor për politikanët ishte ta bënin këtë më të lehtë. Ai vuri në dukje Poloninë, e cila varet shumë nga qymyri.
Timmermans ka një rol kryesor këtë vit, brenda BE-së dhe globalisht, pasi ai drejton marrëveshjen e gjelbër të bllokut, që synon të transformojë ekonominë evropiane në një bazë me karbon të ulët dhe drejton përpjekjet e bllokut për të ndryshuar qasjen e shteteve me klimën.
BE ka vendosur në ligj objektivin e vet për klimën, për uljen e emetimeve me të paktën 55% deri në 2030, krahasuar me nivelet e vitit 1990. Ky është një nga objektivat më të zgjatur në kohë për klimën.
Timmermans tha se nuk mund të bëhej më shumë se kaq për përmirësimin e klimës, por tha se ai po kërkonte nga vendet anëtare të BE të japin më shumë para për financimin e klimës.
“Qasja jonë është ambicioze. Unë mendoj se ne kemi bërë diçka dhe shpresoj që të tjerët të ndjekin këtë shembull. Unë shoh atë që po bëjnë vendet dhe është e papërfillshme me atë që duhet të bëjmë”, shtoi ai.
Burimi:The Guardian/Përshtati:Gazeta “Si”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
