Besimtarët ortodoksë në mbarë vendin kremtojnë sot festën e Pashkës, një ndër ngjarjet më të rëndësishme në kalendarin e të krishterëve, e cila simbolizon ngjalljen e Jezu Krishtit.
Në Tiranë mesha u mbajt në katedralen “Ngjallja e Krishtit”, e cila drejtua nga kryepeshkopi Anastas Janullatos, i cili mbajti liturgjinë e shenjtë që u ndoq nga qindra besimtarë.
Kryepeshkopi dha mesazhet e tij për besimtarët ortodoksë në momentin e ringjalljes së Jezu Krishtit, tri ditë pas vdekjes i kryqëzuar, me shpresën se besimtarët do të mund të marrin dritë nga drita e Perëndisë.
Flaka e shenjtë është simboli i fitores mbi vdekjen dhe besimtarët i mbajnë të ndezur qirinjtë gjatë gjithë natës së Pashkës. Pas meshës besimtarët kryejnë edhe ceremoninë e thyerjes së vezët së Pashkëve.
Festimet e Pashkëve përpos meshës së madhe të së shtunës mbrëma, vijojnë edhe me drekën tradicionale të së dielës.
Mesazhi i kësaj dite të madhe tregon fitoren e jetës mbi vdekjen, e dritës mbi errësirën, e dashurisë mbi urrejtjen.
Kur kujtojmë Pashkën, nuk mund të veçojmë vezët e kuqe, e cila simbolizon jetën, ndërsa ngjyra e kuqe, sakrificën e birit të Perëndisë, Krishtit, i cili u kryqëzua për shpëtimin e të gjithë njerëzimit.
Urimet për më shumë begati dhe dritë në zemrat e besimtarëve nuk mund t’i mungojnë kësaj feste. “Krishti u ngjall, vërtet u ngjall”, është refreni i kësaj dite festive.
Politikanët urojnë Pashkët
Kryeministri Edi Rama u ka uruar besimtarëve pashkët ortodokse nëpërmjet një postimi në faqen e tij zyrtare në “Facebook”.
Edhe ish-kryeministri Sali Berisha ka uruar besimtarët të cilët kremtojnë ngjalljen e Krishtit si ngjarjen dhe mrekullinë hyjnore më të madhe në historinë e Krishtërimit.
Berisha shprehet se Pashkët janë ditë shprese dhe përjetësie.
Ndërsa, kryetarja e LSI-së, Monika Kryemadhi, në një reagim në rrjete sociale shprehet se vetëm dashuria mes njëri-tjetrit është e gjithëpushtetshme mbi të keqen dhe rruga e duhur drejt paqes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
