.png)
Gazeta Si – Kreu i Komisionit të Prokurimeve Publike, Jonaid Myzyri është paraqitur në SPAK këtë të hënë, ku ka dëshmuar më shumë se 2 orë.
Pas dy orësh marrje në pyetje, ai ka lënë SPAK, ndërsa nuk ka pranuar të flasë për gazetarët në lidhje me arsyen e paraqitjes së tij.
Sipas burimeve paraprake, ka dyshime se ai është thirrur për disa procedura tenderimi të zhvilluara nga institucioni që drejton, në cilësinë e personit që ka dijeni. Megjithatë, kjo mbetet për t’u konfirmuar zyrtarisht nga ana e Prokurorisë së Posaçme.
Kjo është hera e dytë që Myzyri thirret për t’u marrë në pyetje nga prokurorët e posaçëm lidhur me disa tendera publikë të dyshuar si korruptivë.
Më 20 shkurt të këtij viti, ai nuk dha sqarime para mediave teksa doli nga ambientet e SPAK, ku ishte marrë në pyetje për rreth 2 orë.
Burime paraprake bëjnë me dije se marrja e tij në pyetje lidhet me ankimet e bëra mbi procedura tenderuese, ku dyshohet për marrëveshje të fshehta paraprake mes komisionit dhe firmave fituese.
Mësohet se mbi 20 praktika tenderuese janë në në verifikim nga prokuroria. Myzyri e mban këtë post që prej vitit 2021.
Po ashtu, në janar të këtij viti qeveria ka hapur garën për ta zëvendësuar Myzyrin, proces që ende nuk ka ndodhur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
