Sistemi bankar dha afërsisht 21 miliardë lekë kredi të re gjatë muajit shtator, duke iu kthyer rritjes vjetore pozitive.
Sipas të dhënave të Bankës së Shqipërisë, kredia e re u rrit me 1.2% krahasuar me shtatorin e vitit të kaluar.
Ndërkohë, kredia për individët vijoi edhe gjatë shtatorit tendencën e qëndrueshme të rritjes afatgjatë, me një zgjerim prej 4% të volumit të kredisë së re krahasuar me një vit më parë.
Sipas BSH-së në nëntë muaj bankat kanë disbursuar rreth 174.4 miliardë lekë kredi, 4.8% më shumë krahasuar me të njëjtën periudhë të vitit 2020.
Kreditimi po i afrohet gradualisht niveleve të vitit 2019, megjithëse shuma e huasë së re është rreth 2% më e ulët krahasuar me 9-mujorin e vitit 2019.
Deri tani, kontributi në rritje ka ardhur nga individët, ku kredia e re është rritur me 43%.
Rritja e kredisë për individët po udhëhiqet sidomos nga rritja e tregut të pasurive të paluajtshme, ku bankat po mbështesin fuqishëm kërkesën nëpërmjet huadhënies. Por, edhe përmirësimet në ekonomi po përmirësojnë gradualisht edhe kredidhënien me qëllim financimin e konsumit.
Ndërkohë, në segmentin e biznesit, kredia ende është në nivele më të ulëta krahasuar me vitin e kaluar, me 9% më pak.
Sinjalet pozitive të kreditimit të ekonomisë duken më qartë edhe në ecurinë e stokut të kredisë që shënoi rritje me më shumë se pesë miliardë lekë krahasuar me muajin gusht.
Në fund të muajit shtator, portofoli total i kredisë për ekonominë arriti në 636.9 miliardë lekë. Krahasuar me të njëjtën periudhë të një viti më parë rritja e portofolit të kredisë ka arritur nivelin 7%, nga 6.6% që kishte qenë rritja vjetore muajin e kaluar.
Pavarësisht se kredia e re ende nuk ka arritur nivelet e para pandemisë, teprica e kredisë paraqitet në rritje të qëndrueshme.
Edhe në këtë rast rritja më e lartë regjistrohet në segmentin e individëve, ku portofoli i kredisë është zgjeruar me 10.3%, ndërsa për bizneset rritja është pak më e ulët, me 7% më shumë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.