.png)
Kredia në euro ishte në rritje gjatë gjithë vitit 2021 dhe arriti nivelet më të larta në gjashtë vitet e fundit.
Sipas statistikave të Bankës së Shqipërisë, për 11 muajt e vitit 2021 sektori bankar dha 846 milionë euro kredi të reja në valutën europiane,duke u rritur me 46% krahasuar me të njëjtën periudhë të një viti më parë.
Sipas kohëzgjatjes së kredisë, peshën më të lartë në portofol e ka kredia afatgjatë me maturim mbi pesë vjet, që përbënte mbi 45% të totalit, ndërsa pjesa e mbetur ndahej mes maturitetit afatshkurtër dhe atij afatmesëm.
Nga ana tjetër, kredia e re në lekë për 11-mujorin e vitit të kaluar pësoi rënie, me 6.1% më pak krahasuar me të njëjtën periudhë të një viti më parë.
Megjithatë, në vlerë kredia në lekë ngeli dominuese edhe vitin e kaluar, me një total disbursimesh prej 114.6 miliardë lekësh.
Sipas kohëzgjatjes, edhe kredia në lekë është dominuar kryesisht nga afatet e gjata të maturimit, me rreth 42% të totalit.
Rikthimi i rritjes së kredisë në euro gjatë vitit të kaluar mund të shpjegohet nga disa faktorë dhe ndoshta më kryesori është rritja e lartë e depozitave në euro. Sipas Bankës së Shqipërisë, depozitat në valutën europiane u rritën me 17.7% ose me 800 milionë euro për 11-mujorin e vitit të kaluar. Rritja e depozitave në euro rrit mundësitë e bankave për të kredituar në këtë monedhë.
Një faktor tjetër janë edhe normat më të ulëta të interesit. Norma mesatare e huave të reja të dhëna për individët gjatë 11 mujave të vitit 2021 ishte 3.88%, ndërsa i njëjti tregues për lekun rezultoi 5.87%.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
