.png)
Nga Gazeta ‘SI’ – Në gjysmën e dytë të vitit 2024, bankat tregtare zgjeruan më tej stokun e kredisë për individë, duke prekur nivelin më të lartë të 5 viteve të fundit.
Shifrat e Bankës së Shqipërisë tregojnë se kredia për banesa u rrit me 17.4% ose 14 miliardë lekë në gjashtëmujorin e dytë. BSH thotë se zgjerimi i kësaj kredie u ndikua edhe nga programi lehtësues i qeverisë për punonjësit e administratës. Kredia për banesa mban 67.4% të totalit të stokut të kredive.
Kredia konsumatore ka pasur po ashtu një ecuri pozitive, me rritje vjetore 15.3%.
Banka raporton një rikthim të kredive në euro, që lidhet kryesisht me huanë hipotekore, por monedha lek mbetet më e preferuara dhe mban 74.3% të totalit.
Për të dyja monedhat, normat e interesit janë ulur gjatë gjashtëmujorit të dytë 2024.
Një rritje e fortë e kredisë raportohet edhe për bizneset me 16.6%, kryesisht për biznesin e madh, 28%. Kredia për biznesin e mesëm u ngadalësua në 3.8%.
Përshpejtim të ndjeshëm shënoi edhe kredia për sektorin e industrisë dhe tregtisë me norma të larta rritjeje përkatësisht me 20% dhe 15.8%. Ndërkohë, kredia për sektorin e ndërtimit dhe për bujqësinë shënoi një rritje me mesatarisht 16.5% dhe 11.4%.
Më e theksuar kjo kërkesë ka qenë për investime të lidhura si me sektorin energjetik- projekte për energjinë e rinovueshme; ashtu edhe me sektorin e hotelerisë, si dhe me sektorët që lidhen me hallka të tjera të zinxhirit ekonomik dhe që reflektojnë interesin e shtuar për turizëm në vendin tonë, analizon Banka.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
