Nga Gazeta ‘SI’ – Në tre muajt e parë të vitit 2023, çmimet e prodhimit vazhduan të qëndrojnë të larta dhe patën një rritje të fortë, me 9.4%. Gjithsesi nga një vit më parë, kur nisën efektet e parë të krizës së çmimeve, rritja është përgjysmuar.
Rritjen më të madhe e ka pasur seksioni i energjisë me 18.3%, industria nxjerrëse 13% dhe industria përpunuese me 7%.
Për tregun vendas, çmimet e prodhimit janë rritur me 9.3% ku sipas grupeve rritjen më të madhe e ka pasur industria nxjerrëse me 21.3% dhe më pas industria përpunuese me 11%.
Për tregun e jashtëm, pra produktet që prodhohen në Shqipëri dhe eksportohen, çmimet janë rritur me 9.1% për të njëjtën periudhë, drejtuar nga rritja e energjisë, me 35%.
Më herët, Banka e Shqipërisë raportoi se në gjysmën e dytë të vitit 2022, inflacioni në vend po drejtohet nga presionet e brendshme të çmimeve më shumë se ato të jashtme.
Indeksi i Çmimeve të Prodhimit mat ecurinë e çmimeve të produkteve që prodhohen në Shqipëri dhe shiten në tregun vendas ose eksportohet.
Nga ana tjetër, çmimet e importit patën një ngadalësim të dukshëm nga 2022-shi, duke u rritur me vetëm 1.2%. një vit më parë kjo vlerë ishte rreth 11%. Energjia pati rritjen më të madhe të çmimit në këtë indeks, me 6.5%, ndjekur nga industria nxjerrëse me 5% dhe përpunuese me 0.8%.
Indeksi i Çmimeve të Importit mat ecurinë e çmimeve të transaksioneve të produkteve industriale të importuara për tu shitur në tregun vendas.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
