Një ngarkesë e madhe me drogë, e llojit kokainë është sekuestruar në Kosovë. Nga informacionet paraprake dyshohet se droga ishte fshehur në një kamion me mish. Pjesë e këtij operacioni ka qenë policia italiane, shqiptare dhe ajo e Kosovës, të cilat janë sinjalizuar nga DEA amerikane.
Për rastin në fjalë po hetohet prej më shumë se dy muajsh, ndërsa sasia e madhe e lëndës narkotike, e cila dyshohet se vjen nga Brazili, është futur në Portin e Durrësit para 15 ditësh dhe ka qenë në vëzhgim nga policia.
Kokaina ishte fshehur në kamionin me mish pule dhe konteineri u nis nga Amerika e Jugut, ndaloi në Gioia Tauro në Itali dhe më pas ndaloi në Durrës.
Me të mbërritur kontejneri në Durrës, policia shqiptare ka konstatuar drogën, por nuk ka ndërhyrë, duke e lejuar që të kryeshin procedurat për të zbuluar se cili do të ishte destinacioni final i tij.
Pasi kanë kryer procedurat, autoritetet e kanë ndjekur kamionin me kontejnerin sipër, i cili është nisur për në Kosovë. Në këtë moment është njoftuar edhe policia e Kosovës dhe sa ka kaluar kufirin ajo ka ndërhyrë duke bërë edhe sekuestrimin e sasisë së madhe të drogës në Lipjan.
Kamioni ishte i mbushur me mish, ndërsa pakove dhe kontejnerëve u është vendosur çip.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
