.png)
Nga Gazeta 'Si'- Qeveria e Kosovës ka votuar sot për ndalimin e përdorimit të Tik-Tok në rrjetet shtetërore të komunikimit dhe ka urdhëruar të gjithë zyrtarët shtetërorë që ta largojnë atë nga pajisjet zyrtare.
Propozimi për ndalimin e rrjetit social Tik-Tok ka ardhur nga zv.ministri i Punëve të Brendshme, Bardhyl Dobra.
“Me qëllim të rritjes së sigurisë kibernetike MPB i rekomandoi Qeverisë që të ndaloi instalimin, përdorimin dhe funksionimin e aplikacionit TikTok dhe gjitha shërbimeve të tij në gjitha rrjetet shtetërore të komunikimit elektronik. Obligohen të gjitha institucionet publike që të vendosin kufizimet e nevojshme teknike për ndalimin e funksionimit të shërbimit të rrjetit social TikTok”, tha Dobra në mbledhjen e Qeverisë.
Me këtë gjithë zyrtarët publik janë të obliguar që në pajisjet zyrtare të largojnë aplikacionin TikTok.
Platforma e ndarjes së videove, e cila është në pronësi të kompanisë kineze Bytedance, ka pohuar prej kohësh se nuk i ndan të dhënat e përdoruesve me qeverinë kineze dhe se drejtohet në mënyrë të pavarur.
Por disa ekspertë shqetësohen se informacionet e ndjeshme mund të ekspozohen kur aplikacioni shkarkohet, veçanërisht në pajisjet qeveritare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
