Gazeta Si – Shpresat e Kosovës për një kualifikim të mundshëm në Euro 2024 kanë marrë fund sot. ‘Dardanët’ barazuan 1-1 në Zvicër dhe ky është një rezultat i mirë, por në Gjermani nga Grupi I do të shkojnë Rumania dhe Zvicra.
Një ndeshje para mbylljes së kualifikueseve, Kosova mban vendin e 4-t, me 11 pikë. Skuadra e drejtuar nga trajneri Primoz Gliha kishte shumë mungesa të rëndësishme në Zvicër, megjithatë nuk doli e mundur përballë Granit Xhakës dhe Xherdan Shaqirit dhe para shumë tifozë kosovarë që ishin në stadium.
Muhamet Hyseni, sulmuesi 22-vjeçar i Llapit në kampionatin kosovar, realizoi golin e barazimit në fundin e ndeshjes. Një debutim ëndrrash për lojtarin e ri, i cili mposhti portierin e Interit, Jan Somer, 9 minuta pasi kishte hyrë në fushë.
Xherdan Shaqiri pati një mundësi të mirë në ndeshjen e luajtur në stadiumin “St. Jakob-Park”, por u ndal nga Visar Bekaj, ish-portieri i Tiranës. Zvicra është kualifikuar matematikisht për në Euro 2024.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
