.png)
Kryeministri Edi Rama deklaroi sot nga Shkodra se falë investimeve në infrastrukturën rrugore koha e lidhjes me Tiranën brenda kësaj dekade do të jetë rreth 40-45 minuta.
Gjatë çeljes së konkursit ndërkombëtar për Rozafën e re në Shkodër, Rama u ndal edhe te investimet në infrastrukturën rrugore, që sipas tij, do të përmirësojnë ndjeshëm ndërlidhjen.
“Është pjesë e një vizioni shumë më të gjerë që kombinon së bashku investimet publike të cilat për Shkodrën dhe gjithë këtë territor që shkon deri lart në Theth, apo shtrihet deri në kufirin me Malin e Zi po shtohen dita-ditës”, tha Rama.
Sipas tij, e gjitha kjo duke konsideruar domosdoshmërinë e një lidhjeje shumë të shpejtë dhe shumë të sigurt të Shkodrës qoftë me veriun lart, por edhe me Tiranën dhe jugun.
“Kryesore mbetet sfida për ndërtimin deri në Murriqan të Korridorit Blu, i cili tanimë e ka një segment të përfunduar dhe të prekshëm për të gjithë aksin Thumanë-Kashar, por që do të vazhdojë me segmentet e tjera që do të lidhin Balldrenin me Milotin, Milotin me Muriqanin dhe Balldrenin me Thumanën”, tha Rama.
Sipas kryeministrit, për të gjitha këto projekte janë të qarta edhe hapat që do ndiqen.
“Ndërkohë një pjesë të rëndësishme të punës për projektet e kemi bërë dhe për pak ditë do të lidhen edhe kontratat e reja për segmentet më poshtë, nga Thumana në Kashar tanimë e kemi, nga Kashari në Rrogozhinë nga Rrogozhina në Fier”, tha Rama.
Kryeministri theksoi se koha e lidhjes së Shkodrës me jugun poshtë do të jetë sa është sot koha e lidhjes me Tiranën.
“Do të mund të shkohet deri në Vlorë për 2 orë dhe kështu me radhë me gjithë projektet e tjera”, theksoi ai.
Konkurs ndërkombëtar për Rozafën e re, Rama: Ikonë e këtij shekulli për Shkodrën
Në Shkodër u zhvillua sot konkursi ndërkombëtar, ku 5 studio të mirënjohura europiane paraqesin përpara jurisë projekt-idetë për Rozafën e re, e cila do ta ripërtërijë e zgjerojë hotelin kryesor të qytetit, me një kapacitet të ri për Shkodrën.
I pranishëm në këtë ceremoni, kryeministri Edi Rama theksoi se Shkodra po rilind dita-ditës dhe po fiton përmasën e re të një destinacioni të Shqipërisë turistike.
“Është një kënaqësi e jashtëzakonshme të shohësh një ngjarje kaq të madhe që ndodh në Shkodër. Është vërtetë një moment shumë i bukur që jemi sot këtu me 5 studio të njohura ndërkombëtare me reputacion të padyshimtë”, tha Rama.
Kryeministri vlerësoi se kjo do të sjellë 5 mundësi një nga të cilat do të zgjidhet nga juria për të ndërtuar një objekt i cili nuk është thjesht një objekt privat.
“Është një objekt që ne synojmë të krijojmë një ikonë të këtij shekulli për Shkodrën, e cila është shumë e pasur me monumente, gjurmë të historisë, ku çdo brez ka lënë gjurmën e vetë dhe ku kjo ndërtesë do të jetë një gjurmë, e cila do t’i shtohet kësaj trashëgimie të Shkodrës për brezat që vijnë”, theksoi Rama.
Rama theksoi po ashtu se tashmë po i jepet dora e fundit edhe projektit për Muzeun e Kujtesës që do të jetë një vlerë e shtuar për qytetin e Shkodrës.
“Ky është një event historik për Shkodrën, sepse nga ky event fillon lënia e një gjurme të re për brezat që vijnë”, tha Rama.
Studiot pjesmarrëse:
Benedetta Tagliabue – EMBT Architects nga Barcelona
Kuehn Malvezzi Architects nga Berlini
Selgascano Architects nga Madridi
Baukuh Architects nga Milano
Piero Lissoni & Partners nga Milano
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
