Gazeta Si – Disa raketa balistike të Koresë së Veriut u lëshuan në brigjet veriperëndimore të Koresë së Jugut, tha ushtria e Koresë së Jugut, duke shtuar se aktiviteti u zbulua të hënën, disa orë pas stërvitjes së përbashkët vjetore të ushtrive koreano-jugore dhe amerikane.
Lëshimet e shumta të raketave përfaqësojnë testet e para balistike të njohura të Phenianit që kur Presidenti i SHBA-ve, Donald Trump u kthye në Shtëpinë e Bardhë si president.
Komanda e Shefave të Përbashkët të Shtabit të Koresë së Jugut tha se zbuloi lëshimin nga pjesa e brendshme e provincës veriore të Hwanghae rreth orës 13:50 me orën lokale (05:50 në Shqipëri), por nuk dha detaje të mëtejshme mbi llojin e lëshuesve të përdorur.
Ushtria e Seulit tha gjithashtu se “ka forcuar mbikëqyrjen dhe ka mbajtur një pozicion të gatishmërisë së plotë, në bashkëpunim të ngushtë me Shtetet e Bashkuara”.
Koreja e Jugut dhe Shtetet e Bashkuara kanë nisur stërvitjet vjetore të quajtura “Mburoja e Lirisë”, e cila do të zgjasë 11 ditë, e denoncuar prej kohësh nga Koreja e Veriut, si prova kamuflimi për një pushtim kundër saj dhe të cilave ajo i është përgjigjur gjithmonë me teste të llojeve të ndryshme.
Pheniani, për këtë rast, lëshoi deklarata të shumta dënuese me qëllim “të denonconte provokimet” dhe të kërcënonte Seulin dhe Uashingtonin të cilët do të paguanin “një çmim të tmerrshëm për aktin e tyre të rrezikshëm provokues”.
Kohët e fundit është folur sërish për bazat e raketave me rreze të gjatë veprimi të pranishme në vend: njëra prej tyre është maskuar edhe si një fushë golfi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
