Nga Gazeta 'SI' - Në 9 muaj, kompanitë e sigurimeve në Shqipëri kanë arkëtuar 18.3 mld lekë, 7.4% më shumë se e njëjta periudhë e një viti më parë. kontratat e lidhura gjatë kësaj kohe u shtuan me 7.7%, duke kaluar mbi 1.1 mln. Shifrat tregojnë për ecuri të mirë të tregut, por ritmi i rritjes është më i ngadaltë se një vit më parë.
Kontratat e sigurimit të jo-jetës mbajnë peshën kryesore të tregut, me 91.92%, ato të jetës 8.05%. Sigurimi vullnetar zë rreth 40% dhe ai i detyrueshëm 60%.
Sigurimet e detyrueshme, ku dominojnë sigurimet e makinave arkëtuan mbi 11 mld lekë në 9 muaj, me rritje rreth 8% në raport vjetor.
Sigurimet vullnetare arkëtuan më shumë se 7 mld lekë, me rritje 6.5%. Në portofolat e Pronës, Përgjegjësive, Garancive të cilat gjatë periudhës janar - shtator 2024 siguruan mbi 3 mld lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 68.9%, të pasuara nga sigurimi i Përgjegjësisë së Përgjithshme me 22% të totalit.
Në portofolin sigurimi nga Zjarri dhe Forcat e Natyrës, gjatë periudhës janar - shtator 2024, vihet re një rritje prej 3.43% e vëllimit të primeve të shkruara bruto të këtij portofoli dhe një rritje me 2.09% e numrit të kontratave të sigurimit, krahasuar me periudhën janar - shtator 2023.
Të ardhurat nga sigurimet e Aksidenteve dhe Shëndetit, gjatë periudhës janar - shtator 2024, arritën në rreth 1 mld lekë, duke shënuar një rritje prej 2% në krahasim me periudhën janar - shtator 2023.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.