.png)
Nga Gazeta ‘SI’ – Tregu i sigurimeve në Shqipëri ka përjetuar rritje konstate përgjatë muajve të shkuar, por dëmshpërblimet për qytetarët shfaqen në rënie.
Sipas të dhënave të periudhës janar-tetor, kompanitë e sigurimeve kanë arkëtuar rreth 22.4 miliardë lekë, duke shënuar një rritje vjetore të konsiderueshme prej 10.5%. Kjo rritje e vëllimit tregon një zgjerim të tregut, gjë që reflektohet edhe në numrin e kontratave, i cili arriti në 1.38 milionë me një rritje prej 5% nga viti i kaluar.
Pavarësisht këtij fluksi në rritje të primeve, tregu ka shfaqur një anomali në lidhje me dëmshpërblimet e paguara për klientët. Shuma totale e dëmshpërblimeve është ulur me 0.02% nga një vit më parë, duke arritur në 6.2 miliardë lekë.
Kjo kontradiktë bëhet më e thellë kur analizohet vetëm 10-mujori, ku kompanitë kanë paguar 2% më pak dëmshpërblime se vitin e shkuar, ose rreth 6.9 miliardë lekë. Pjesa dërrmuese e këtyre pagesave, 5.2 miliardë lekë, ishin dëmshpërblime të sigurimit motorik, po ashtu me rënie.
Tregu dominohet fuqishëm nga policat e detyrueshme, të cilat zënë pothuajse 62% të totalit. Pjesa tjetër konsiston në sigurimet vullnetare.
Më tej, segmenti i jo-jetës (kryesisht sigurimet motorike) dominon me rreth 92% të totalit.
Sigurimet e jetës zënë vetëm 8% të totalit të tregut.
Një segment që po shfaq shenja pozitive rritjeje është ai i sigurimit të pronës. Nga sigurimi i pronës, kompanitë arkëtuan 3.6 miliardë lekë, kryesisht për sigurimin nga zjarri dhe dëmtime të tjera. Kjo kategori u rrit me 4.53% në një vit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
