Gazeta Si – Kolegji i Posaçëm i Apelimit, vendosi ndryshimin e vendimit të Komisionit të Pavarur të Kualifikimit për shkarkimin në detyrë të gjyqtarit të Apelit të Tiranës, Fatri Islamaj dhe rikthimin e tij në detyrë. Kështu ish-kreu i Gjykatës së Tiranës dhe kreu i KED do të vijojë punën si gjyqtar.
Islamaj u shkarkua me shumicë votash nga KPK, pasi dy komisioneret Valbona Sanxhaktari dhe Pamela Qirko arritën në përfundimin se subjekti kishte kryer deklarim të pamjaftueshëm për apartamentin e blerë nga i ati në vitin 2010 në çmimin 65 mijë euro.
Sipas shumicës, babai i subjektit nuk kishte pasur burime të ligjshme për blerjen e kësaj pasurie të përdorur nga Islamaj.
Lulzim Hamitaj në pakicë e kundërshtoi këtë arsyetim me argumentin se babai i Islamajt kishte pasur burime financiare të ligjshme të mjaftueshme dhe se kërkesa e shumicës për dokumentim të shkëmbimeve financiare për qiranë brenda familjes ishte e tepruar.
Seancën e të martës në Kolegjin e Apelimit, duke iu referuar opinionit të vëzhguesit ndërkombëtar, Islamaj kërkoi që të vlerësohen drejt marrëdhëniet familjare në raport me qiramarrjen e apartamentit të të atit.
Në seancën e së martës në Kolegjin e Apelimit, ai e cilësoi si të pabazuar konkluzionin sa i përket pasurisë.
Islamaj këmbënguli se me provat dhe shpjegimet e dorëzuara, nuk mbetej asnjë dyshim se e kishte paguar rregullisht qiranë në favor të të atit.
Ai sqaroi se marrëdhënia e qirasë ishte zgjatur në mënyrë periodike dhe për faktin se në atë periudhë kishte ardhur në jetë djali i tij i parë.
Subjekti sqaroi se në atë vendbanim ishte e lehtë që prindërit të gjendeshin afër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
