.png)
Lirohet nga burgu Selim Çekaj, babai i Arbër Çekajt, i arrestuar pak muaj më parë, pasi në kontejnerin e tij me banane, u gjetën 49 kg kokainë në Portin e Durrësit.
Këtë të premte, Gjykata e Posaçme e Apelit për Korrupsionin dhe Krimin e Organizuar, vendosi ndryshimin e vendimit të shkallës së parë për Çekajn, nga “arrest me burg” në “arrest në shtëpi”.
Më parë GJKKO kishte refuzuar 2 herë kërkesën e Çekajt për ndryshimin e masës së sigurisë nga "arrest me burg" në "arrest shtëpie", kërkesë që është mbështetur edhe nga SPAK.
Selim Çekaj është babai i Arbër Çekajt, i cili është i dënuar me 14 vite burg, pasi para 3 vitesh në magazinat e kompanisë së tij të bananeve 'Arbri Garden' në Maminas, u pakëm nga policia 613 kg kokainë.
Në të njëjtën skemë u kap edhe Selim Çekaj, ku në kontejnerin ku ai priste bananet e porositura me firmën e tij “EcoalMax” nga Ekuadori, policia zbuloi të fshehura 49 kg kokainë.
Kontejneri i Selim Çekajt ishte nën vëzhgim prej 1 muaji dhe se kokaina ishte e ndarë në 31 pako të vendosura në shtyllat anësore të kontejnerit me banane, ndryshe nga sasia prej 613 kg kokainë që u kap i biri i 72-vjeçarit, të cilat ishin fshehur në dyshemenë e kontejnerit me banane.
I moshuari, përmes avokatit të tij, kishte bërë edhe herë të tjera kërkesë për një masë më ë butë sigurie, por vetëm këtë të premte gjykata vendosi t’ia ndryshojë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
