SPAK ka kërkuar dënimin me 13 vite burg për ish- punonjësin e sigurisë në portin e Durrësit, Ardian Bega dhe 18 vite burg për peshkatarin Altim Mystihakën.
Ata akuzohen si të përfshirë në trafikimin e 137 kg kokainë nga Ekuadori drejt Shqiperisë. Por me gjykim të shkurtuar, dënimi i Begës ulet në 8.8 vite, burg ndërsa i Mystihakës ulet në 12 vite.
Sipas Prokurorisë, këta persona janë bashkautorë në trafikimin e një sasie lënde narkotike të llojit kokainë, të sekuestruar në kontenierë, të cilët vinin nga Ekuadori në drejtim të Shqipërisë, duke kaluar tranzit në portin e Pireut, Greqi
Për këtë çështje vijon të jetë në kërkim Gentian Malindi, i dyshuar si porositësi i lëndës narkotike, për të cilin gjykata veçoi dhe pezulloi për një vit çështjen.
Dyshohet se Malindi porositi 137 kg kokainë në Ekuador, e cila u zëvendësua nga policia me oriz në portin e Pireut në Greqi.
Ishin grekët që sinjalizuan policinë shqiptare, e cila bashkë me prokurorinë, hoqi drogën dhe vuri oriz dhe GPS.
Pas tri ditësh në port shkuan 2 persona, Altin Myslimhaka dhe Ardian Bega, për të marrë drogën, ku u arrestuan menjëherë.
Kush është Gentian Malindi
Malindi, me profesion jurist, është djali i avokatit Ilir Malindi. Ai është një person me precedent të mëparshëm penal.
Më 8 qershor 2013, ai është arrestuar nga policia, pasi u kap me 500 kg drogë të llojit kanabis sativa, por më vonë gjykata e liroi.
Droga u kap nga policia në zonën e Plazhit, e fshehur në furgon tip “Benz Mercedez”, me targë AA 938 AE, e cila kishte si destiancion Italinë.
Por 45-vjeçari është i njohur edhe në fushën e biznesit të peshkut. Ai ka në pronësinë e tij një varkë e cila peshkon në detin Adriatik të regjistruar edhe në QKR.
Më 18 nëntor 2018, Malindi ka paditur edhe Policinë Kufitare, pasi sipas tij nga kontrollet e njëpasnjëshme që i ka bërë në varkën e peshkimit, i shkaktuan dëm ekonomik e moral.
Madje babai i tij, Ilir Malindi më 30 tetor 2014, ka paditur në gjykatë edhe ish-ministrin Saimir Tahiri, se Policia Shtetit përndjek dhe dhunon djalin e tij për këtë çështje. Ai kërkoi në gjykatë 5 milionë lekë dëmshpërblim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
