.png)
Gjykata e Durrësit ka lënë në burg shtetasin Nazif Arjoski, i cili u arrestua të premten në pikën kufitare të portit të Durrësit i akuzuar për trafikun e 324 kg lëndë narkotike kokainë.
Lënda narkotike u gjet në serbatorin e kamionit që drejtonte 41-vjeçari nga Maqedonia e Veriut. Në fakt, mjeti ishte ngarkuar me materiale ndërtimi dhe kishte si destinacion Napolin në Itali.
Prokurori Afrim Shehu ka kërkuar që arrestimi të konsiderohej i ligjshëm dhe të merret si masë sigurie “arresti në burg” për Arjoskin.
Kërkesa e prokurorit u mor në konsideratë nga gjyqtari Rexhep Bekteshi që vendosi si masë sigurie “arrest në burg” për 41-vjeçarin nga Struga.
Ndonëse Ajroski ka mbërritur në gjykatë rreth orës 09:00, seanca është shtyrë për shkak të mungesës së një përkthyesi. Pas disa orëve, seanca u zhvillua me praninë e përkthyesit dhe shoferi maqedonas ka zgjedhur të mos flasë.
Kokaina ishte e paketuar në sasi të vogël, që mbanin logo të ndryshme të kompanive private dhe skuadra sportive.
Në disa raste janë përdorur logo të një kompanie të njohur për prodhimin e parfumeve “Dior”, të ekipit të njohur të futbollit Paris SG, logo të ekipit të basketbollit në SHBA, Chikago Bulls, markë pijesh alkoolike, etj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
