.png)
Nga Gazeta Si- Furnizuesit kinezë kanë mbushur mediat sociale amerikane këtë javë, duke u kërkuar përdoruesve të tejkalojnë tarifat 145% të Presidentit Donald Trump ndaj Pekinit duke blerë direkt nga fabrikat e tyre.
Një përdorues i TikTok, i cili quhet Wang Sen, pretendon se ai është prodhuesi origjinal i produkteve për shumicën e markave luksoze, ndërsa në dorë ka një cantë Birkin që duken shumë të shtrenjta. Ai punon në një nga kompanitë që prodhojnë pjesë të produkteve që më pas tregtohen nga një kompani tjetër.
“Pse thjesht nuk na kontaktoni dhe blini nga ne? Nuk do t’i besoni çmimet që do t’ju japim,” tha ai në një klip.
Videoja e tij u hoq më vonë nga aplikacioni. Ndërkohë, megjithatë, DHgate, një dyqan online me shumicë, i famshëm për shitjen e mallrave luksoze kineze, ka arritur në vendin e dytë në aplikacionet Apple në SHBA. Një aplikacion tjetër, Taobao, faqja e tregtisë elektronike të Kinës, është në vendin e 7.
Është shumë e pamundur që këta të jenë furnizues të vërtetë për marka si Lululemon dhe Chanel, thanë ekspertë të shumtë për CNN. Prodhuesit legjitimë zakonisht nënshkruajnë marrëveshje moszbulimi, kështu që nuk ka gjasa që këta krijues të shesin produktet.
Por videot po nxjerrin në pah jo vetëm ankthin që tarifat po u shkaktojnë konsumatorëve, por gjithashtu zbulojnë se sa shumë mbështeten blerësit tek Kina. Këta krijues kinezë po japin mesazhin se, pavarësisht këmbënguljes së Shtëpisë së Bardhë që politikat e tyre ekonomike të vendosin Amerikën në vend të parë, të njëjtat politika do të bëjnë që konsumatori amerikan të humbasë aksesin në produktet e tyre të preferuara ose të paguajë më shumë për to.
“Kjo është mënyra se si fillon një luftë tregtare”, lexohet një koment nën një video që pretendon të shfaqë furnizuesit e Lululemon me mbi 1.5 milion pëlqime.
Ju nuk jeni duke blerë drejtpërdrejt nga këto marka
Në një video, një influencer e quajtur LunaSourcingChina tregon dy fabrika që thotë se ndodhen në Yiëu, një qytet i famshëm për tregun e tij me shumicë, duke pretenduar se marka aktive e veshjeve Lululemon i merr streçet e saj prej 98 dollarësh direkt prej tyre.
“Unë mendoj se shumica prej jush e dinë çmimin e Lululemon ose markave të tjera të mëdha … dhe këtu, në këto dy fabrika, ju mund t’i merrni ato për rreth 5 deri në 6 dollarë,” tha ajo.
Megjithatë, Lulu shpejt i hodhi poshtë këto pretendime.
Në një deklaratë të hënën, Lulu tha se “nuk bashkëpunojmë me prodhuesit e identifikuar në videot në internet dhe ne u bëjmë thirrje konsumatorëve që të jenë të vetëdijshëm për produkte potencialisht të falsifikuara dhe dezinformatat”.
Dy fabrikat e përmendura në TikTok nuk janë të përfshira në listën e furnizuesve të Lululemon edhe pse kompania punon me një numër fabrikash në Kinë, por gjithashtu ka furnizues në vende si Vietnami, Peruja dhe Kamboxhia.
Megjithatë, çdo fabrikë që ofron porosi direkte për konsumatorët amerikanë është ndoshta e paligjshme, thonë ekspertët.
“Çdo prodhues që prodhon për markat me emër të madh ka të ngjarë të jetë nën detyrime të rrepta kontraktuale për të mos zbuluar këtë fakt”, tha për CNN Hao Dong, lektor në Universitetin e Southampton.
Ata definitivisht nuk do t’i shesin publikisht ato produkte me emra të mëdhenj.
Produktet në videot e TikTok mund të jenë gjithashtu mashtrime dhe falsifikime me cilësi të lartë, të cilat Lululemon është përpjekur më parë t’i luftojë.
E vërteta pas luksit
Pra, a janë orët e shtrenjta apo çantat e luksit të prodhuara në Itali apo Zvicër, në të vërtetë të prodhuara në Kinë?
Përgjigja nuk është “as një ‘po’ e qartë, as një ‘jo’ e qartë”, tha për CNN Regina Frei, profesoreshë në Universitetin e Arteve në Londër.
Shumë marka luksoze montojnë paraprakisht disa artikuj ose pjesë në Kinë përpara se të montojnë produktin përfundimtar në Francë dhe Itali. Këto mund të jenë gjëra të tilla si matërialet për një orë të shtrenjtë ose paketimi për një çantë dizajni. Por nuk ka asnjë mënyrë për ta ditur plotësisht për shkak të zinxhirëve të famshëm të furnizimit luksoz, tha Frei.
Edhe fabrikat e vendosura në Itali ose vende të tjera mund të kenë ende lidhje me Kinën, si pronësi ose menaxhim i huaj.
“Nëse flisni për çanta shumë të shtrenjta që përfshijnë shumë punë manuale, ato ndoshta do të montohen diku paraprakisht dhe më pas do të finalizohen, të themi, në Francë”, tha ajo.
Pra, edhe nëse disa nga pjesët e mallrave luksoze vijnë nga Kina, nuk ka asnjë garanci për masat e duhura të sigurisë dhe kontrollit të cilësisë nëse blini produktin përfundimtar nga këto depo në TikTok. Gjithashtu nuk ka asnjë garanci apo kthim.
Dhe është e paqartë se si këto produkte, edhe nëse blihen direkt nga prodhuesit kinezë, mund t’i shpëtojnë tarifave 145% të Trump. Ekspertët parashikojnë që edhe mallrat e blera direkt nga prodhuesit në faqet si Temu dhe Aliexpress do të përballen me rritje çmimesh.
Përballja me konsumizmin
Ndërsa këto video nga prodhuesit kinezë bëhen virale, varësia e Amerikës nga zinxhirët e furnizimit kinez dhe ndërkombëtar është në qendër të vëmendjes.
Kjo transparencë po i detyron disa konsumatorë të përballen me një pyetje të varrosur prej kohësh në pjesën e prapme të psikikës: Nga vijnë në të vërtetë produktet e mia të preferuara?
“Nëse Kina do ndalonte së prodhuari, dyqanet tona do të ishin bosh,” tha Frei.
Por vëmendja po thekson gjithashtu ndikimin mjedisor të porositjes në masë nga prodhuesit kinezë, një praktikë që shpërtheu në popullaritet me rritjen e dyqaneve si Shein dhe Temu, të cilat përfituan nga përjashtimi i taksave de minimis që së shpejti do të zhduket.
Transporti individual i paketave nëpër botë është një “katastrofë mjedisore”, tha Frei.
Këto pako mbështillen individualisht në plastikë dhe dërgohen nga aeroplanë ose anije mallrash në mbarë botën, duke krijuar një gjurmë masive karboni, tha Frei. Dhe shpesh, këto artikuj të lirë përfundojnë si mbeturina.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
