.png)
Nga Gazeta ‘Si’- Mbledhja në Komisionin për Çështjet e Brendshme dhe të Mbrojtjes është shoqëruar sërish me debat.
Kësaj here, përplasja ishte mes kryetares së Shërbimit Informativ Shtetëror, Vlora Hyseni dhe deputetit Flamur Noka.
Në fjalën e saj shkurt, Hyseni bëri një prezantim të buxhetit dhe më pas kërkoi që seanca të zhvillohej me dyer të mbyllura.
“Projekt-buxheti për vitin 2026 është parashikuar një fond prej 3 miliard lekë. Kisha kërkuar mirëkuptimin e këtij komisioni për të kaluar në seancë të mbyllur”-u shpreh kryetarja e SHISH Vlora Hyseni.
Por kjo kërkesë ishte e papranueshme për deputetin Flamur Noka. Ai kërkoi që raportimet e drejtueses së SHISH të bëheshin publikisht për të treguar transparencë.
“Nuk është sekret t’u thuash qytetarëve që buxheti i miratuar nga qeveria është kaq dhe kërkesat e shërbimit për të funksionuar normalisht, janë kaq për të mbuluar nevojat tona. Ne po tallemi me qytetarët në rast se do vazhdojmë kështu.
Unë jam deputet i vjetër, këtu në atë vend janë ulur disa krerë shërbimesh në vend të asaj zonjës. Është hera e parë në 35 vite parlament që terri informativ mbulon këtë komision në raportimin e shërbimit informativ. Tallet zonja me taksapaguesit, kjo është e papranueshme.
Sekreti shtetëror është i përcaktuar me ligj. Ky nuk është raportim, por është ‘më ka çuar nëna me la gojën’. Nuk i hedhim dot hi syve shqiptarëve”-u shpreh Noka.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
