Gazeta Si - Gjykata e Lartë ka lënë në fuqi masën “arrest në burg” për rusin e dyshuar për spiunazh, Mikhail Zorin.
Ai i ishte drejtuar me rekurs Gjykatës së Lartë për një masë më të butë sigurie, kërkesë që nuk është pranuar duke lënë në fuqi vendimin e Gjykatës se Apelit Durrës.
Më herët Gjykata e Lartë ka rrëzuar edhe kërkesën e ruses tjetër, Svetlana Timofeeva dhe ukrainasit Fedir Aplatov.
Pak ditë më parë, Rusia i ka kërkuar Shqipërisë ekstradimin e 33-vjeçares Timofeeva e arrestuar edhe ajo në uzinën e armëve në Gramsh.
Tre të rinjtë u arrestuan pas incidentit në uzinën e armëve në Gramsh, ku sulmuan rojet me spraj neoparalizues.
Ata po hetohen nga Prokuroria e Elbasanit dhe dyshohet se janë të dërguar të shërbimeve inteligjente për të mbledhur informacione sekrete në Shqipëri, kryesisht për infrastukturat kritike.
Të tre u vunë në pranga dhe akuzohen për “Goditja për shkak të detyrës”, “Dhënia e informatave sekrete”, dhe “Sigurimi i informatave”, kryer në bashkëpunim .
Të tre u arrestuan nga policia në 20 gusht, ndërsa u hetuan edhe si spiunë të shërbimit sekret rus.
Me dyshimin se tre miqtë, gjendeshin në Shqipëri me detyrën për të kryer spiunazh, grupi i hetimit ka prova të forta se ata kanë fotografuar dhe baza të tjera ushtarake në gusht.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
