Skuadrat më të mira që u renditën në 4 vendet e para, mësuan sot se si do të luajnë në “Final4”. Shorti u hodh në shtëpinë e futbollit në praninë e Presidentit të FSHF, Armand Duka dhe drejtuesve të skuadrave të kualifikuara. Nga vazot e përcaktuara prej klasifikimit në sezonin e rregullt (Egnatia dhe Vllaznia në të parën ndërsa Dinamo City dhe Partizani në të dytën) shorti përcaktoi çiftet Egnatia – Partizani dhe Vllaznia – Dinamo City.
Gjysmëfinalja e parë, ajo mes Vllaznisë dhe Dinamo City-t, do të luhet në orën 20:00 të dielën e 4 Majit. Ndërsa e dyta, Egnatia – Partizani do të zhvillohet një ditë më pas në të njëjtën orë. Kalimi në finale përcaktohet në 90 minuta. Në rast barazimi në gjysmëfinale, kualifikohet ekipi i renditur në vendin e pare ose të dytë, dmth Egnatia dhe Vllaznia. Ndeshjet e “Final 4” do të luhen në stadiumin “Arena Kombëtare” dhe Finalja e madhe do të arbitrohet nga polaku Szymon Marciniak.
Në përfundim të shortit, Skënder Gega (trainer i Partizanit) tha për mediat: E pashmangshme, besoj “Final 4” duhet ta shijojmë, klubi ka ardhur në pikësynimet e veta. Do gëzojmë në çdo mënyrë, edhe të ishte me Vllazninë dhe Dinamon. Deri me datë 5 kemi ditë ekstra për të punuar. Të bëjmë më të mirën, në fund të fitojë futbolli. Egnatia është skuadra më e fortë, por në “Final 4” tjetër qasje. Ardhja në “Final 4” na ka dhënë qetësi, por dhe besim. Është në “Arena Kombëtare” me mbështetjen e tifozëve, nuk ka shumë gjëra për të thënë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
