Tirana International Airport (TIA) ka njoftuar se ka ulur tarifën e pasagjerit nga 12,5 në 10 euro.
Ky është vendimi i parë që ka marrë TIA për këtë vit të ri, por pretendon që do të ndryshojë dhe Kontratën e Koncesionit të miratuar që në vitin 2004.
Përveç lehtësimit modest për pasagjerët, kompania paralajmëron dhe nisjen e një plani ambicioz investimesh në strukturën e aeroportit, për të kontribuar në lehtësimin e çmimeve të biletës dhe zhvillimit në tërësi të aviacionit dhe turizmit shqiptar.
Si pasojë e kësaj uljeje të tarifës, thotë koncesionari, pritet që efekti në uljen e çmimit të biletës dhe në rritjen e numrit të fluturimeve dhe destinacioneve, do të jetë i ndjeshëm.
Si pjesë e ndryshimeve dhe rinegociimit të Kontratës së Koncesionit, TIA bën me dije se një paketë e plotë investimesh, të cilat arrijnë një total prej afërsisht 100 milionë Euro do të jetë në vëmendjen e menaxhimit të ri, me fokus, zgjerimin e kapacitetit akomodues të aeroportit me 6 milionë pasagjerë në vit, zgjatimin e pistës, përmirësimin e plotë të infrastrukturës së aeroportit dhe përmirësimin e ndjeshëm të cilësisë së shërbimeve.
Pjesë e paketës së negocimit të Kontratës së Koncesionit është edhe liberalizimi i Ground Handling Services (Shërbimet në Tokë), liberalizimi i tregut të karburantit të avionëve bashkë më uljen e çmimit dhe ulja e tarifës së pasagjerit. Kjo do të sjellë një efekt të menjëhershëm në tërheqjen e linjave të tjera “low cost”, përfshirë Ryan Air, dhe rrjedhimisht do të ketë efekt në uljen e çmimit të biletës si dhe në rritjen e numrit të fluturimeve dhe destinacioneve.
Kompania Kastrati Group, e themeluar që në vitin 1990, u bë zotëruese 100% të kapitalit aksionar të TIA-s, pas blerjes së këtyre aksioneve nga kompania kineze “Real Fortress Limited” në muajin dhjetor 2020.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
