.png)
Gazeta Si – Karlos Alkaraz ka fituar Masters 1000 të Majemit, duke u bërë kështu spanjolli i parë në histori dhe në moshën 18 vjeç e 11 muaj edhe tenisti më i ri që triumfon në këtë turne. Kampioni nga Murcia mundi në finale norvegjezin Kasper Rud pas dy setesh, me rezultatin 7-5 dhe 6-4. Finalja zgjati një orë e 52 minuta.
Pas këtij suksesi, i treti në turnetë ATP, Alkaraz ngjitet sot në vendin e 11-të të klasifikimit botëror. Spanjolli e nisi ndeshjen pak i kontraktuar, duke shkuar deri në 1-4, më pas ai reagoi fuqishëm dhe përmbysi gjithçka në 7-5, duke përfituar edhe nga gabimet e pafalshme në momentet delikate të kundërshtarit.
Rud reagoi vetëm në një moment, duke rikuperuar një nga dy ‘break’, por vetëm kaq. Të dy tenistët më pas mbajtën shërbimet e tyre me lehtësi deri në 6-4 final, që e bëri Alkarazin të futet në histori. Një arritje e madhe kjo, që nuk ka mundur ta bëjë as Rafael Nadal. Në qiellin e tenisit botëror sapo ka lindur një yll shumë i shndritshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
