.png)
Gazeta Si – Një sasi monetare prej 500 mijë eurosh janë gjetur në autobusin e linjës me Italinë në Portin e Durrësit në tragetin që vinte nga Bari.
Pas kontrollit të imtësishëm nga policia në hyrje të portit, janë gjetur të fshehura në tavanin e autobusit paratë, të futura në 6 qese plastmasi, brenda së cilës ndodheshin disa pako.
Kartëmonedhat ishin fshehur në tavanin e mjetit, pranë impiantit të kondicionerit dhe mësohet se agjentët kishin informacion për transportin e eurove.
Policia deklaroi se në kuadër të operacionit policor të koduar “Eurot”, zbulimi i parave ka ardhur pas një hetimi një mujor.
Ndërkohë, burime paraprake, bëjnë me dije se është ndaluar pronari, i cili ishte njëkohësisht edhe drejtuesi i autobusit, E.Ç., i cili po merret në pyetje.
Përveç tij është shoqëruar në komisariat edhe ndihmësi i tij për të dhënë deklarime në lidhje me sasinë e parave të gjetur në autobusin e linjës Bari-Durrës.
Deri më tani dyshohet për një sasi rreth 500 mijë €, por nuk dihet ende shuma e saktë dhe paraprakisht mësohet se vijon numërimi i parave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
