.png)
Gazeta Si – I ashtuquajturi Neni 42, që është pjesë e një ligji që e rregullon migracionin në mbrojtje të shëndetit publik të amerikanëve, i cili ishte vendosur për shkak të pandemisë COVID-19, skadoi të premten në Shtetet e Bashkuara të Amerikës, duke shkaktuar kaos në kufirin me Meksikën.
Dhjetëra mijëra azilkërkues meksikanë nxituan të hynin në Shtetet e Bashkuara përpara se të vendoseshin rregullat e reja të shpallura nga administrata e presidentit Joe Biden.
Rregullorja e skaduar, e vendosur gjatë presidencës së ish-presidentit Donald Trump, ishte në fuqi që nga muaji mars i vitit 2020 dhe u kishte mundësuar zyrtarëve dhe policëve të kufirit që të kthejnë azilkërkuesit në kufi, me arsyetimin e parandalimit të përhapjes së COVID-19.
Qytetarë të shumtë, duke përfshirë fëmijë, mbrëmjen e së enjtes po ecnin përgjatë një kufiri të SHBA-ve të rrethuar me tela me gjemba, të pasigurt se ku të shkonin ose çfarë të bënin më pas.
Autoritetet amerikane kanë njoftuar një sërë masash rigoroze që synojnë frenimin e kalimeve të paligjshme të kufijve, së bashku me krijimin e rrugëve të ligjshme që emigrantët mund t’i ndjekin.
Sipas këtyre masave të reja, emigrantët e mundshëm mund të aplikojnë në internet, të gjejnë një sponsor dhe t’i nënshtrohen kontrolleve të së kaluarës së tyre.
Suksesi i këtyre reformave ka potencialin për të transformuar ndjeshëm mënyrën në të cilën emigrantët i afrohen kufirit SHBA-Meksikë.
Numri i emigrantëve në kufirin e SHBA-së u rrit që kur presidenti Joe Biden mori detyrën në janar të vitit 2021, pjesërisht i nxitur nga problemet ekonomike, pasiguria dhe shtypja politike në vende si Venezuela, Kuba dhe Nikaragua.
Që nga fillimi i punës së administratës së Biden, një rekord prej 4.6 milionë emigrantësh të paligjshëm janë arrestuar duke kaluar kufirin ilegalisht.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
