Me valixhe në duar, të moshuar, nëna shtatzënë dhe me fëmijë të vegjël, të gjithë në pritje të një njoftimi për të mësuar nëse do të udhëtojnë ose jo.
Kjo ka qenë panorama e mëngjesin e të enjtes, me qindra qytetarë, të cilët kanë përjetuar të shqetësuar bllokimin e fluturimeve në aeroportin “Nënë Tereza” në Rinas.
Situata, në fakt ka qenë kaotike dhe e paqartë, sepse udhëtarëve iu komunikohej nga autoritetet që të prisnin, ndërsa orët kalonin.
Qindra prej tyre kishin prerë biletat për një nga udhëtimet e ditës së sotme dhe ndodheshin atje në pritje me orë të gjata pa ditur se çfarë do të ndodhë.
Të 19 fluturimet e planifikuara për ditën e sotme, do të anulohen, për të rinisur nesër në mëngjes. Ndërkohë, sot do të jetë e hapur hapësira ajrore vetëm për fluturimet esenciale.
Ministrja e Infrastrukturës dhe Energjisë Belinda Balluku deklaroi në një prononcim për median se do të rinisin fluturimet esenciale, ato humanitare, emergjente, shëndetësore, diplomatike, shtetërore dhe ushtarake.
Në një njoftim për shtyp të TIA-s, “ende nuk ka një orë të saktë për rifillimin e nesërm të fluturimeve. Sapo ta kemi si njoftim, do ta lajmërojmë menjëherë”.
Fluturimet në aeroportin ndërkombëtar të Rinasit, u pezulluan mëngjesin e së mërkurës, pasi kontrollorët e trafikut ajror ndërprenë punën, me arsyetimin se për shkak të uljes së pagës, ata kanë pasur stres, si pasojë e rënies së financave në familje dhe janë deklaruar të paaftë për punë.
Kjo situatë, shkaktoi si rrjedhojë pezullimin e të gjitha fluturimeve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
