.png)
Gazeta Si – Gjykata e Posaçme ka kaluar për gjykim fraksionin e ndarë të dosjes “5D” në ngarkim të 9-ish zyrtarëve të Bashkisë Tiranë.
Sipas SPAK, kompania “5D”, e zotëruar në mënyrë indirekte nga Redi Molla dhe Mariglen Qato, ish-drejtor në institucionet në varësi të Bashkisë Tiranë, ka përfituar tendera në kundërshtim me ligjin nga “Tirana Parking” dhe “Klubi Sportiv Tirana”.
Konkretisht, në vitin 2020, e pandehura Deborah Keçi, nën drejtimin e “Klubit Sportiv Tirana”, institucion në varësi të Bashkisë, në bashkëpunim me 3 persona të tjerë, në cilësinë e anëtarëve të Komisionit të Vlerësimit të Ofertave, kanë krijuar për “5D Konstruksion” sh.p.k avantazhe dhe privilegje të padrejta në një tender.
Gjithashtu në vitin 2019, e pandehura Eglantina Zëre, nën drejtimin e “Tirana Parking”, institucion në varësi të Bashkisë Tiranë, në bashkëpunim me 4 të pandehur të tjerë, kanë favorizuar kompaninë V.A.S, e njëjtë me 5D-në sipas SPAK në përfitimin e një tenderi rikonstruksioni.
Gjykimi ndaj tyre do të kryhet me procedurën e gjykimit të shkurtuar, ç’ka do të thotë se në fund atyre iu zbret 1/3 e dënimit.
Për fraksionin e dytë të dosjes “5D”, SPAK ka marrë të pandehur 9 ish-zyrtarë të Bashkisë së Tiranës, më konkretisht dy ish-drejtoreshat, Deborah Keçi dhe Eglantina Zëre, si dhe ish-zyrtarët Teuta Guri, Rejnaldo Gjerazi, Jetjon Mera, Rivjola Baxha, Enkelejda Qyta, Bruno Koçi dhe Kristo Zhulati.
Të 9 të pandehurit akuzohen vetëm për veprën penale, “Shkelja e barazisë së pjesëmarrësve në tendera apo ankande publike”, e kryer në bashkëpunim.
Ndërkohë në fraksionin e parë të dosjes, ku pjesë e saj janë 3 ish-drejtorët Molla, Tushe dhe Qato, si dhe administratorët e kompanisë janë ende në fazën e kërkesave paraprake, ku të gjithë personat në atë dosje kërkojnë gjykim shkurtuar.
Dosja e parë që tashmë SPAK ka mbyllur hetimet dhe është gati ta çojë në gjykatë, përbëhet nga 7 të pandehur, të cilët janë veçuar, si: Redi Molla, me detyrë ish-Drejtor i Ujësjellësit Tiranë; Mariglen Qato, ish-drejtor në departamentin Mbështetës; Taulant Tusha, ish-drejtor i Punëve Publike në Bashki; Enton Punavija, Drejtor i Drejtorisë së Transportit; Julian Zanaj, Drejtor i Prokurimeve në Bashki; Albano Janku, Drejtor i Planifikimit të Burimeve Njerëzore në Bashki; Nestor Muhamellari, administrator i shoqërisë “5D Konstruksion”.
Akuzat që rëndojnë mbi ish-zyrtarët e Bashkisë së Tiranës janë korrupsion pasiv dhe aktiv, refuzim për deklarim, shkelje të barazisë dhe pjesëmarrjes në tendera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
