Kallas: Nuk kemi asnjë indikacion se Putini dëshiron armëpushim në Ukrainë

Nga Gazeta ‘Si’- Përfaqësuesja e Lartë e BE-së, Kaya Kallas, tha se çdo marrëveshje paqeje duhet të imponojë detyrime mbi agresorin dhe jo mbi viktimën, duke paralajmëruar se shpërblimi i agresionit rus do të vinte në rrezik shtetet më të vogla të kontinentit.

Kallas theksoi se fokusi i diskutimeve duhet të jetë tek lëshimet që duhet të bëjë pala ruse, jo Ukraina. Ajo paralajmëroi se imponimi i kushteve mbi Kievin – si kufizimi i ushtrisë apo heqja dorë nga territori – mund të çojë në një pushtim të ri në të ardhmen.

Komentet erdhën pas publikimit të një draft-marrëveshjeje SHBA-Rusi me 28 pika, i cili raportohet se përfshinte kushte të favorshme për Moskën, përfshirë braktisjen e anëtarësimit në NATO dhe reduktimin e ushtrisë ukrainase në 600 mijë trupa.

Sipas Kallas, diskutimi duhet të zhvendoset në drejtimin e kundërt: “Nëse duam të parandalojmë vazhdimin e luftës, duhet të kufizojmë ushtrinë e Rusisë dhe buxhetin e saj ushtarak.”

Ajo kujtoi se Rusia ka sulmuar 19 vende në 100 vitet e fundit, ndërsa asnjë prej tyre nuk ka sulmuar Rusinë, duke e cilësuar kapacitetin e lartë ushtarak të Moskës si kërcënim të drejtpërdrejtë për sigurinë evropiane.

Pas rrjedhjes së draftit, qeveritë evropiane u rreshtuan në mbështetje të Ukrainës për të forcuar pozicionin e saj negociues. Në takimin e së dielës në Gjenevë, SHBA dhe Ukraina ranë dakord për një version të rishikuar të tekstit, i cili ende nuk është bërë publik dhe po has rezistencë nga Rusia. Çështjet kyçe mbeten të hapura përpara një takimi të mundshëm mes presidentëve Volodymyr Zelensky dhe Donald Trump.

BE-ja ka bërë të qartë se Ukraina duhet të ketë të drejtën të organizojë vetë forcat e saj të armatosura, që aktualisht vlerësohen në 800–850 mijë ushtarë. “Është e drejta sovrane e çdo vendi të vendosë për madhësinë e ushtrisë së tij,” tha Kallas, duke e quajtur debatin për kufizimet një “kurth të ngritur nga Rusia”.

Kallas deklaroi gjithashtu se Moska ka hyrë në bisedime sepse “Putini nuk mund t’i arrijë objektivat e tij në fushëbetejë”. Sipas saj, nuk ka asnjë shenjë se Rusia kërkon armëpushim, përkundrazi po intensifikon aktivitetet ushtarake.

Nga ana tjetër, disa ministra të jashtëm evropianë kërkuan rritjen e presionit ekonomik, ushtarak dhe politik mbi Moskën, derisa të tregojë vullnet të vërtetë për paqe.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.