.png)
Disa javë më parë, një postim viral në Twitter kapi në mënyrë të përsosur një fenomen të njohur për shumë prej nesh. Postimi, një përgjigje ndaj pyetjes së dikujt "cila është e keqja jote më e madhe” mori rreth 55 mijë reagime. Përgjigja ishte: Sillem keq me njerëzit kur jam e mbingarkuar!
Kushdo që është sjellë keq me një të afërm apo familjar në momente që ka qenë i mbingarkuar, e kupton më së miri përgjigjen e personit.
Ne nuk jemi në maksimumin tonë në momente si këto, por ato janë pjesë e reagimit njerëzor ndaj të qenit të mbingarkuar.
"Truri ynë merr informacion nga shqisat tona si shikimi, prekja, nuhatja, zëri dhe shija, kështu që kjo na ndihmon të kuptojmë mjedisin tonë," thotë Manahil Riaz, psikoterapist.
Të jesh i mbingarkuar do të thotë që shqisat tona kanë marrë shumë informacion dhe tani ne po ndihemi të mbingarkuar ndërsa po marrim këtë informacion.
“Kur jeni të mbistimuluar, korteksi juaj paraballor del jashtë linje”, shpjegon Emma Shandy Anway, terapiste. Kjo është pjesa e trurit tuaj përgjegjëse për vendimmarrjen racionale, vuri në dukje ajo.
Kur jemi të stresuar, korteksi paraballor kalon nga reflektues dhe racional në reaktiv, tha Anway. Në këto kushte, truri juaj nuk mendon për ruajtjen e marrëdhënieve ose zgjidhjen efektive të problemeve. Në vend të kësaj, është në panik.
Për më tepër, sistemi i reagimit ndaj stresit të trupit tuaj aktivizohet, pavarësisht nëse keni të bëni me një stresor aktual apo thjesht me një të perceptuar, sipas Riaz. Përgjigja juaj ndaj stresit më pas ndikon në disponimin tuaj.
“Mbistimulimi do të përforcojë dhe përshpejtojë të gjitha reagimet," tha Anway. Kur jeni tepër i ngarkuar, sistemi juaj nervor është në thelb i çrregulluar.
Ekspertët shpjegojnë se janë dhe situata shumë të thjeshta, të të përditshmes që mund të të mbingarkojnë, si për shembull, zgjimi vonë, më pas të derdhet kafeja në këmishë dhe kur do ta ndërrosh, këmishën tjetër e ke të pa hekurosur. Një mori ngjarjesh të vogla në një kohë shumë të shkurtër bën që të ndjehesh e frustruar dhe të reagosh keq, edhe ndaj partnerit apo fëmijës sepse janë momente stresi që mblidhen të gjitha bashkë.
Kur jeni në mbingarkesë, çdo bezdi do të shkaktojë reagim të menjëhershëm. Ju do të keni më shumë gjasa t'u bërtisni fëmijëve tuaj ose t'i flisni keq një kolegu nëse keni arritur pragun tuaj të mbistimulimit, sepse truri juaj nuk po mendon në mënyrë racionale. Dhe nëse çështjet që ju stresojnë janë më pak të dukshme, mund të mos e kuptoni se po shqetësoheni më shumë. Këto gjëra më delikate vetëm sa do të ulin aftësinë tuaj për t'u marrë me stresorët e tjerë.
Teknologjia ndoshta po luan një rol të madh në stimulimin tuaj të tepërt.
“Kur flasim për ndjenjën e mbistimulimit, mendoj se teknologjia është një temë shumë e rëndësishme,” thotë Riaz.
Mes teksteve, emaileve dhe njoftimeve të mediave sociale, është e lehtë të arrihet mbingarkesa shqisore.
"Unë mendoj se njerëzit janë disi të emocionuar dhe të tërhequr nga këto njoftime dhe tani ne jemi në një shoqëri ku është shumë normale t'i hedhësh një sy telefonit tënd, ndërsa ndoshta 30 vjet më parë, ne ishim më pak të mbingarkuar nga teknologjia”, thotë Riaz.
Ndërsa shumë prej nesh mund të jenë të varur nga telefonat tanë, ne në fakt dëshirojmë paqen dhe të pasur vëmendjen në çdo moment, dy gjëra që telefonat nuk i ofrojnë. Me informacione të vazhdueshme që vijnë, në krye të jetës reale të përditshme jashtë teknologjisë, nuk është çudi që të gjithë jemi të mbistimuluar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
