.png)
Gazeta Si – Donald Trump është ish-presidenti i parë amerikan që gjykohet dhe dënohet në një gjyq penal, por disa nga paraardhësit e tij kanë pasur probleme me ligjin.
Rasti më i famshëm është sigurisht Watergate, skandali që bëri që Richard Nixon të jepte dorëheqjen në vitin 1974.
Hidraulikët e Niksonit
Presidenti republikan i atëhershëm, duke përmbledhur brutalisht, fillimisht mbuloi bastisjen e njerëzve të tij në selinë e Partisë Demokratike – e cila ndodhej në ndërtesën nga e cila mori emrin çështja dhe që e shndërroi çdo skandal të mëvonshëm në një “gate” (portë) – më pas kur hetimet filluan të përfshinin bashkëpunëtorët e tij, të cilët gradualisht dhanë dorëheqjen, u zbuluan përpjekja e tij për të penguar hetimet dhe për të mbyllur rrjedhjet nga dolën lajmet me të ashtuquajturin ekip të “hidraulikëve”.
Nixon përfundimisht dha dorëheqjen për të shmangur fajësimin – ato ishin kohë të tjera, me sa duket – dhe pasardhësi i tij, Gerald Ford i dha atij një falje presidenciale përpara se çështja të arrinte në gjykatë.
Megjithatë, 69 persona përfunduan në gjyq, 48 prej të cilëve u dënuan me dënime përfundimtare që varionin nga 4 vjet e gjysmë për Gordon Liddy, një nga hidraulikët, deri në disa gjoba financiare.
Bill Clinton dhe Monica Lewinsky
Një rast tjetër i famshëm është fajësimi i Bill Clinton në vitin 1998. Hetimi filloi nga dy skandale – Whitewater, që kishte të bënte me marrëveshjet e pronave të paluajtshme të presidentit të atëhershëm dhe ankesat për ngacmime të paraqitura nga një grua, Paula Jones – dhe përfundoi me fajësimin e Clinton për gënjeshtra nën betim si president dhe pengim i hetimit për lidhjen e tij me Monica Lewinsky, stazhiste asokohe në Shtëpinë e Bardhë. Por Senati amerikan e liroi Clinton-in nga të dyja akuzat.
Historia e gjeneralëve të shekullit të ‘19
Presidenti tjetër, përpara Trumpit, që do të fajësohej, ishte Andrew Johnson në vitin 1868, në një Amerikë ende të ndarë pas përfundimit të Luftës Civile.
Ai u akuzua se kishte shkarkuar Sekretarin e Luftës, Edwin Stanton pa votën e Kongresit, duke e zëvendësuar me gjeneralin, Lorenzo Thomas.
Një vit më parë, Kongresi kishte miratuar një ligj të veçantë, Aktin e qëndrimit në detyrë, pikërisht për të mbrojtur Stanton nga shkarkimi. Përsëri, Senati nuk gjeti vota të mjaftueshme për të dënuar Johnson.
Mbi një karrocë
Rasti më kurioz ka të bëjë me presidentin Ulysses Grant, pasardhësin e Johnson, por mbi të gjitha gjeneralin që udhëhoqi ushtrinë e Unionit Verior drejt fitores në Luftën Civile, si dhe një njeri të pasionuar pas kuajve.
Megjithatë, Grant është gjithashtu i vetmi president, para Trumpit, që është arrestuar. Në vitin 1872 ai u ndalua dy herë në dy ditë për tejkalim të shpejtësisë, ndërsa po ecte me në një karrocë të drejtuar nga dy kuaj nëpër rrugët e Uashingtonit.
Herën e parë ai mori një paralajmërim, herën e dytë u dërgua në komisariat së bashku me disa miq – pjesa më e madhe zyrtarët më të lartë të qeverisë – me të cilët ai ishte në garë dhe u lirua me kusht me 20 dollarë, ekuivalenti me 500 dollarë sot. Në fund të gjithë u dënuan me gjobë.
Megjithatë, ndryshe nga rastet e tjera, gazetat e kohës nuk botuan asnjë rresht për atë arrestim. Kjo u zbulua në vitin 1908 nga agjenti që e arrestoi, William West, një ish-ushtar afro-amerikan i ushtrisë së unionit, i cili u lavdërua nga vetë Grant për kryerjen e detyrës së tij denjësisht.
Në një intervistë me “Sunday Star” në Uashington ai tha – dhe faktet u konfirmuan nga departamenti i policisë së kryeqytetit një shekull më vonë – se presidenti dukej si “një student i kapur në flagrancë nga mësuesi”, por se ai ishte absolutisht ishte i sjellshëm dhe e shoqëroi agjentin West në stacionin e policisë pikërisht me karrocën e tij.
Gjatë gjyqit, miqtë e Grant u përpoqën ta shkarkonin nga puna West, por presidenti i dërgoi një letër shefit të policisë duke lavdëruar guximin e policit.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
