.png)
Gazeta Si – Pak më shumë se dy muaj nga Europani i Gjermanisë trajneri Silvinjo duhet të shqetësohet, shumë madje. Jo për listën përfundimtare, por për atë që po ndodh aktualisht me disa nga lojtarët e sulmit të Kombëtares.
Çështja e Armando Brojës është e njohur tashmë. Klubi i tij në Angli, Fulhemi, ku është huazuar nga Çelsi, e ka nxjerrë jashtë planeve. Për të tretën ndeshje radhazi sulmuesi shqiptar ishte në tribunë të martën në mbrëmje ndaj Notingem Forest, ku Fulhemi humbi 3-1.
Broja nuk po luan më as si zëvendësues dhe nëse shkon në Europian pa minuta në këmbë, do të jetë problem i madh. Të gjithë gjykojnë se ai duhet të luajë titullar në Kombëtaren shqiptare, por pa aktivizim është thuajse e pamundur.
Por nuk është ky problemi i vetëm për Silvinjon në lidhje me sulmin. Probleme me klubin ka edhe Jasir Asani, i cili priste të shitej në merkaton e dimrit, por koreanët kërkuan një shifër të lartë, 3 milionë euro, duke u bërë pengesë për transferimin e lojtarit shqiptar në Europë. Nëse edhe ai nuk luan, shtohen problemet, sepse sulmuesi i djathtë ishte një nga titullarët më të rëndësishëm në eliminatore.
Po të shtojmë këtu edhe dëmtimin e Myrto Uzunit, që humbi dy miqësoret e fundit për një shqetësim në ‘Tendinën e Akilit’, atëherë kambanat e alarmit për stafin kuqezi bëhen shumë të forta, sepse duhen gjetur zgjidhjet më të mirë përpara Europianit.
Sokol Cikalleshi është gati për qendrën, kurse Mirlind Daku mungoi në grumbullimin e fundit. Ernest Muçi, Taulant Seferi, Arbër Hoxha e Arbnor Muçolli janë alternativat për krahët, por është e qartë se me gjendjen aktuale të Brojës, Asanit dhe Uzunit, do të ishte vërtet problem. Shpresat janë që deri në qershor diçka të ndryshojë për këta lojtarë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
